Nga një varg takimesh përgatitore të zhvilluara ditën e djeshme, mund të veçohen dy prej tyre për rezultatet që dhanë.
Gjermania humbi 1-3 ndaj Sllovakisë. Me një ekip eksperimental, gjermanët nuk i bënë dot ballë dëshirës së sllovakëve për të fituar. Goli i Mario Gomez-it në minutën e 13-të do të merrte si përgjigje tre gola të kundërshtarëve. Për Sllovakinë shënuan Hamsik, Duris dhe Kucka.
Rumania në një grup me Shqipërinë në Euro 2016-të, një prej skuadrave më eksperte në mbrojtje, do të humbiste të dielën 3-4 me Ukrainën. Takimi u zhvillua në Torino, ndërsa Ukraina do të ketë dhe një përballje tjetër me Shqipërinë më 3 qershor, në Bergamo.
Me shumë mungesa nga formacioni i zakonshëm, Spanja fitoi 3-1 ndaj Bosnjë-Hercegovinës. Dy prej golave mbajnë firmën e sulmuesit të Selta Vigos, Nolito-s, e një u shënua nga Pedro. Emir Spahic shënoi golin e vetëm të boshnjakëve, por edhe mori kartonin e vetëm të kuq në këtë miqësore.
E ngushtë qe fitorja e Italisë ndaj Skocisë. Graziano Pelle e zhbllokoi rezultatin në minutën e 57-të. Goli i tij nuk u pasua nga të tjerë, me miqësoren që u mbyll 1-0 për italianët.
Fitore e ngushtë dhe për Turqinë ndaj Malit të Zi. Në Antalja, shifrat ndryshuan vetëm në minutën e 94-t. Mehmet Topal qe shënuesi i golit në fitoren 1-0 të vendasve.
E pastër ka qenë fitorja e Portugalisë ndaj Norvegjisë, 3-0. Quaresma, Guerreiro dhe Eder vulosën fatin e ndeshjes me golat e tyre. /tesheshi.com/
