Një propozim i Kremlinit për bisedime të drejtpërdrejta në Moskë midis kryeministrit izraelit Benjamin Netanyahu dhe presidentit palestinez Mahmoud Abbas po merret në konsideratë.
Zyra e kryeministrit izraelit ka deklaruar se ai është i hapur për një takim të tillë pasi Netanyahu u takua në Jerusalem me të dërguarin e Putin-it në Lindjen e Mesme, Mikhail Bogdanov.
Njoftimi i zyrës së Netanyahu-t thoshte: “Ata diskutuan propozimin e presidentit Putin për të patur një takim në Moskë mes kryeministrit dhe presidentit Abbas. Kryeministri paraqiti qëndrimin e Izraelit se ai është gjithmonë i gatshëm të takohet drejtpërdrejt dhe pa parakushte me presidentin Abbas. Ai po e shqyrton propozimin e presidentit rus dhe kohën e një takimi të mundshëm.”
Ndërkohë, agjencia e lajmeve Interfax ka cituar ambasadën palestineze në Moskë të deklarojë sot se presidenti palestinez Mahmoud Abbas është pajtuar për bisedime të drejtpërdrejta me kryeministrin izraelit në Moskë.
Vetë zyra e Abbas-it ka thënë se palestinezët janë gati të marrin pjesë në çdo iniciativë paqeje që synon një zgjidhje të gjithmbarshme dhe të ndershme. /tesheshi.com/
