Nuk ka paqe për dy pilotët e Mercedes-it, kampionin e botës në fuqi, Lewis Hamilton-in, dhe pretenduesin kryesor për t’u shpallur kampion këtë sezon, Nico Rosberg-un.
Edhe një herë tjetër ata janë përplasur së bashku, në më të fundit incident mes tyre. Gjermani kryesonte garën, dhe ishte në xhiron e tij të fundit, kur britaniku u përpoq ta parakalonte në pjesën e jashtme të kthesës së dytë. Rosberg e mori paksa gjerë, dhe Hamilton e ktheu timonin shpejt djathtas, duke sjellë dhe përplasjen. I pari dëmtoi makinën dhe përfundoi në vend të katërt, i dyti çau përpara dhe e kaloi finishin i pari në garën e Austrisë.
Shefi i ekipit, Toto Wolff, e quajti të patru, “brainless”, përplasjen, dukshëm i nervozuar.
Inxhinieri i Hamilton-it, Peter Bonnington, do t’i thoshte pilotit se nuk ishte ky rezultati që po kërkonin, po kaq dukshëm i mërzitur dhe i nervozuar.
Hamilton e hodhi fajin tërësisht te shoku i skuadrës, duke deklaruar në podium se piloton për të fituar. Ndryshe tij, Rosberg u shpreh se qe ndjerë i befasuar që Hamilton u kthye dhe shkaktoi përplasjen.
Përndryshe, kjo përplasje nuk duket se do të kalojë kaq lehtë në skuderinë Mercedes. Zhvillime pritet të ketë në orët pasardhëse, pasi dy pilotët qenë paralajmëruar më herët. Rosberg është po ashtu nën hetim nga komisarët e garës.
Duke iu kthye pjesës tjetër të garës, një moment po aq dramatik do të qe plasja e gomës së makinës së ferraristit Vettel, që e detyroi gjermanin të tërhiqej.
Një garë tepër interesante, Çmimi i Madh i Austrisë do të fitohej kështu nga Lewis Hamilton. Vendi i dytë i takoi pilotit të Red Bull-it, Max Verstappen, e i treti në podium u ngjit Raikkonen i Ferrari-t. Dhjetëshja e parë do të plotësohej me këta pilotë, të cilët e kaluan finishin njëri pas tjetrit, Rosberg, Ricciardo, Button, Grosjean, Sainz, Bottas dhe Wehrlein.
Rosberg kryeson ende në renditjen e përgjithshme, me 153 pikë, me Hamilton-in nga prapa, me 142 pikë.
Hamilton u fishkëllye sot në podium në shenjë proteste. Pas një jave do të garohet në Britani, në shtëpinë e tij, në të dhjetën garë sezonale. Të shohim se për do të jenë fishkëllimat atje. E sigurt është se beteja nuk do të ndalet këtu! /tesheshi.com/
