Zëdhënësi i Ministrisë së Jashtme iraniane, Behram Kasimi, u ka thënë sot gazetarëve në Teheran se përdorimi i një baze ajrore iraniane për ngritjen e avionëve rusë për misione luftimi në Siri ka marrë fund tani për tani.
“Ishte një mision specifik, i autorizuar, dhe për tani ka përfunduar. Ata e kryen atë, dhe tani kanë ikur.”
Zëdhënësi e ka lënë të hapur mundësinë e fluturimeve përsëri në të ardhmen të avionëve luftarakë rusë nga Irani, duke e kushtëzuar atë me situatën në rajon, si dhe me lejen iraniane.
Rusia, në krahun tjetër, e ka konfirmuar faktin se të gjithë avionët e saj luftarakë që përdorën bazën ushtarake iraniane janë kthyer në bazat ruse.
Ministri iranian i Mbrojtjes, Husein Deghan, do ta kritikonte Rusinë orë më parë për një lloj mburrjeje për përdorimin e bazës në Iran.
“Rusët priren natyrisht të tregojnë se janë një superfuqi dhe një vend me ndikim, e se janë aktivë në çëshjet e sigurisë në rajon dhe në botë. Ka një lloj mburrjeje dhe qëndrimi të papeshuar pas deklarimit të këtyre lajmeve,” do t’i thoshte ai një televizioni iranian.
Fluturimet nga territori iranian të avionëve luftarakë rusë drejt Sirisë nisën më 16 gusht, por Irani deklaroi se ato po e përdornin territorin iranian vetëm për t’u rifurnizuar. /tesheshi.com/
