Përfundon në polici vëllai i ministrit të Mjedisit dhe kunati i presidentit të Federatës së Futbollit, Leonard Koka.
Në stresin e madh që uniformat blu kanë këto ditë për të siguruar rendin e qetësinë për ndeshjen Serbi-Shqipëri, nuk kanë kursyer as ata që konsiderohen “vipa”, apo të paprekshëm.
Kështu, policia e Durrësit ka ndaluar vëllain e ministrit Lefter Koka, Leonard Kokën, pasi ku i fundit nuk i është bindur postbllokut policor.
Në njoftimin e Policisë së Shtetit theksohet se, “Nga specialistët për Krimet në Komisariatin e Policisë Durrës, filloi procedimi penal në gjendje të lirë ndaj shtetasit: Leonard Koka, 49 vjeç, banues në Durrës, pasi më datë 06.10.2015, në lagjen Nr.1, në Durrës, gjatë kryerjes së veprimeve të punonjësve të policisë për kontrollin e mjetit të tij, tip Benz, me targa AA 911 LB, ai është larguar duke marrë mjetin, dhe nuk i është bindur thirrjes së punonjësve të policisë për të ndaluar.”
Nard Koka është një personazh i njohur i qarqeve politiko-ekonomike, jo vetëm të Durrësit, por edhe më gjerë, në rang kombëtar. Ai njihet dhe si një prej negociatorëve që ka ulur në tavolinë Ilir Metën dhe Edi Ramën në takimin e famshëm të “ngjalave” në Gjirin e Lalzit në vitin 2012. /tesheshi.com/
