Pas shtatë orësh ka përfunduar mbledhja e Kryesisë së Vetëvendosjes ku kryetari i saj Visar Ymeri ka folur për herë parë për skandalin, me ç’rast ka thënë se kanë pranuar dorëheqjen e Aida Dërgutit dhe se asnjë anëtar tjetër nuk është larguar.
Në mbledhje, sipas tij, janë diskutuar edhe zhvillimet e fundit dhe shkrimet në rrjetet sociale që kanë të bëjnë me ofendimin që Dërguti i kishte bërë ish-kreut të VV-së, Albin Kurti.
“Kryesia njëzëri e dënon dhe e quan të papranueshme gjuhën e përdorur karshi, veçanërisht figurave publike të Lëvizjes Vetëvendosje gjatë kësaj fundjave në rrjetet sociale dhe kërkojmë nga të gjithë aktivistët dhe anëtarësia e Lëvizjes Vetëvendosje që ta ndalin këtë mënyrë të të shkruarit dhe përdorimin e kësaj gjuhe në rrjetet sociale ndaj figurave publike të Lëvizjes Vetëvendosje”, ka thënë Ymeri para gazetarëve.
Megjithatë Ymeri nuk ka pranuar asnjë pyetje nga gazetarët edhe pse u pyet se a po ndahet partia që drejton.
Me të në konferencë u paraqitën edhe Shpend Ahmeti e sekretari i partisë Ismail Kurteshi por nuk folën asnjëri. /tesheshi.com/
