Mbledhja e kryesisë së PD-së duket se ka pasur debate mes kryetarit dhe kritikëve të tij, mirëpo vetë Basha ka folur për diskutime të frutshme. Sipas tij, ka mendime kritike, por që shërbejnë për të arritur në vendime që përfaqësojnë konsensusin e të gjithë anëtarëve të Kryesisë.
Kryesia, sipas Bashës, ka diskutuar me përgjegjësi, ndërsa ka falënderuar anëtarësinë e PD që ka përmbyllur një proces analize, konsultimi, propozimesh.
“Dua t’i kujtoj gjithë anëtarët dhe simpatizantët e PD- së se shqiptarët e shohin këtë jo thjesht si një proces brenda PD, por si një proces nga i cili do lindë një shpresë dhe një rrugë e re për çdo shqiptare dhe shqiptar”, u shpreh ai.
Basha del garant në atë që e quan “proces të transformimit” të PD-së.
“Kryesia ka miratuar vendime që do i japin mundësinë çdo demokrati të kontribuojë në këtë proces dhe unë personalisht do të garantoj që ky të mos jetë një proces formal, por të jetë i vërtetë, ai i bashkimit të të gjitha kontributeve dhe ideve për këtë platforme, për këtë transformim të PD që do i paraprijë transformimit që presin shqiptarët”, përfundoi Basha. /tesheshi.com/
