Tre ditët e takimeve të kualifikueseve europiane për Botërorin 2018 kanë nisur me dy përballje të orës 18:00, të sapombyllura.
Kështu, Turqia ka fituar 2-0 ndaj Finlandës, ashtu siç Serbia ka mposhtur Gjeorgjinë 1-3 në Tbilisi.
Në grupin I të kualifikueseve, Turqia dhe Finlanda janë përballur në Antalja. Vendasit e kanë zhbllokuar shpejt rezultatin, me dy gola të shënuar nga i njëjti lojtar, Cenk Tosun, në minutën e 9-të dhe të 13-të.
E gjithë pjesa tjetër e lojës ka qenë administrim i saj nga vendasit, që në momente të caktuara kanë vuajtur presionin e finlandezëve.
Fitorja e çon Turqinë në kuotën e 8 pikëve, aq sa ka dhe Ukraina e vendit të dytë, por që ende nuk e ka luajtur ndeshjen e saj.
Në kryeqytetin gjeorgjian, përfaqësuesja serbe ia ka dalë të përmbysë epërsinë e vendasve, të siguruar që në minutën e 5-të, për të barazuar në fund të pjesës së parë e për të shënuar dhe dy gola të tjerë në pjesën e dytë.
Suksesi ndaj Gjeorgjisë ia forcon pozitat Serbisë në grupin D, duke marrë përkohësisht vendin e parë, me 11 pikë.
Me interes të jashtëzakonshëm priten ndeshjet e mbrëmjes, posaçërisht Itali – Shqipëri dhe Kosovë – Islandë.
Takimet e tjera të orës 20:45 janë: Austri – Moldavi, Irlandë – Uells, Lihtenshtajn – Maqedoni, Spanjë – Izrael dhe Kroaci – Ukrainë. /tesheshi.com/
