Bisedimet dypalëshe mes Shqipërisë dhe Greqisë, të përfaqësuara nga Ditmir Bushati dhe homologu Nikos Kotzias përfunduan në ishullin e Kretës, ndërsa dy ministrat fluturuan drejt Athinës. Ministria shqiptare e Punëve të Jashtme përmes një njoftimi zyrtar thotë se homologët u fokusuan në çështjet e hapura dypalëshe, por duke mos cituar se cilat janë ato: marrëveshjen e detit, për të cilën u tha nga burime mediatike se është rënë dakord të rinegociohet, ligjin e luftës dhe çështjen çame.
“Gjatë bisedimeve, të cilat u zhvilluan në një atmosferë miqësore dhe konstruktive, u krye një punë substanciale. Të dyja palët pranuan rëndësinë e dialogut në zgjidhjen e çështjeve të pazgjidhura dhe ranë dakord për hapat e mëtejshëm që duhen ndërmarrë për të arritur rezultate pozitive duke u mbështetur në vlerat dhe normat evropiane, në të mirë të dy vendeve dhe popujve të tyre”, thuhet në deklaratën e përbashkët të dy dikastereve të Punëve të Jashtme, të Shqipërisë dhe Greqisë.
Bisedimet konsiderohet të jenë një hap i rëndësishëm përpara dhe përpjekjet për të gjetur zgjidhje të qëndrueshme për problemet ekzistuese prej një kohe të gjatë do të vijojnë.
Mes palëve u ra dakord që ministrat të takohen sërish në Shqipëri në vijim, në mënyrë që të vlerësojnë progresin e arritur dhe të vendosin për hapat e mëtejshëm konkret përpara. Pas takimit, dy ministrat janë nisur për në Bruksel, në mbledhjen e Këshillit të Ministrave të jashtëm të BE-së. /tesheshi.com/
