Ndryshe nga çfarë kanë pretenduar deri më tani autoritetet egjiptiane, avioni i kompanisë ajrore EgyptAir besohet se është rrëzuar një vit më parë në Mesdhe për arsye aksidentale, e nuk ka qenë një akt terrorist.
Një burim i afërt me ekipin hetues francez i ka deklaruar agjencisë së lajmeve AFP se në ato çfarë kishte mbetur nga viktimat franceze të rrëzimit të avionit nuk ishin gjetur gjurmë eksplozivi.
Kësisoj, i njëjti burim ka deklaruar se kjo e bën të pamundur teorinë e Egjiptit se avioni Airbus A320 kishte shpërthyer në qiell në fluturimin nga Parisi për në Kajro.
Burimi bën me dije se rezultatet e kërkimeve të fundit mbështesin teorinë e hetuesve francezë se bëhej fjalë për një aksident, e jo për një akt terrori.
“Kjo i mbyll derën përfundimisht pretendimit për terrorizëm,” ka deklaruar burimi.
Avioni i kompanisë EgyptAir u zhduk nga radari më 19 maj të vitit të shkuar. Ai do të rrëzohej mbi Mesdhe, në ujërat mes Kretës dhe bregut verior të Egjiptit, duke u marrë jetën 66 personave në të, një pjesë e të cilëve ishin qytetarë francezë. /tesheshi.com/
