Nga Bashkim Kastrati
Kosova do të përfshihet në një projekt të madh në fushën e energjisë, që do të ndikonte shumë në zhvillimin ekonomik. Degëzimi mes Shqipërisë dhe Kosovës, përmes projektit të gazit – TAP, i njohur tashmë si ALKOGAP, është ndër prioritetet e Qeverisë së Shqipërisë. Kështu ka deklaruar ministri i Energjisë e Industrisë së Shqipërisë Damian Gjiknuri.
Gjithashtu lidhjen e Kosovës me gazsjellësin TAP përmes degëzimit e ka shpallur si prioritet edhe kreu i ekzekutivit shqiptar, Edi Rama, në ceremoninë e fillimit të ndërtimit të pjesës tokësore të gazsjellësit në Shqipëri, me 30 shtator të këtij viti.
Tashmë Qeveria e Shqipërisë e ka përmbyllur masterplanin e gazit dhe se ai së shpejti pritet të miratohet në qeveri.
Unaza e gazit përbën një seri të projekteve afatgjata në infrastrukturë, si në formën e tubacioneve të reja dhe ndërtimin e kapacitetit të ri. Kostoja e vlerësuar kapitale arrin në afër 1 miliard dollarë amerikane.
Unaza e gazit mëton të lidh shtatë vendet e rajonit që kryesisht karakterizohet me treg dhe infrastrukturë jo mjaftueshëm të zhvilluar në Kroaci, Bosnje, Serbi, Maqedoni ose që mungon plotësisht si në Kosovë, Shqipëri dhe Mal të Zi.
Njohësit e fushës së ekonomisë në vazhdimësi e kanë konsideruar si një mangësi të madhe në të bërit biznes dhe në zhvillimin ekonomik në përgjithësi moszhvillimin në fushën e energjisë. Prandaj zbatimi i këtij projekti konsiderohet si një shtytje e madhe në këtë drejtim
Ministrat e Shqipërisë, Kroacisë dhe Malit të Zi në shtator 2007 kishin nënshkruar në Zagreb projektin e gazsjellësit Jon-Adriatik.
Sipas marrëveshjes , meqë rrjeti i gazit të Shqipërisë do të lidhej me atë të Greqisë, dhe më pas parashihet ndërtimi i një kanali nga Fieri për në Itali dhe kështu do të bëhej lidhja e gazit rus dhe kaspik me tregun euro-perëndimor, vlerësohet e nevojshme për tregun dhe e përshtatshme me kushtet e ambientit që ky rrjet të shtrihet edhe në shtetet tjera të Ballkanit.
Ministrat thoshin se ky gazsjellës “është një prioritet i jashtëzakonshëm”. Madje, ata parashohin, se rrjeti mund të lidhet pastaj edhe me ata në Slloveni e Hungari. Ky projekt konsiderohet si pjesë e Unazës së Gazit të Komunitetit të Energjisë, një trup tjetër i BE-së, që ka të bëjë me gazifikimin e tërë rajonit, propozuar nga Banka Botërore.
Kosova ka nevojë të madhe për këtë projekt
Lulzim Beqiri, magjistër i ekonomisë ka thënë për tesheshi.com se në lidhje me këtë projekt të madhe duhet falënderuar Qeverinë e Shqipërisë që e ka përfshirë edhe Republikën e Kosovës në rrjetin e projektit TAP.
Ai thotë se bizneset kosovare dhe qytetarët e Kosovës kanë nevojë për një kosto më të lirë të furnizimit me lëndë djegëse si për biznese ashtu edhe për përdorim familjar pasi që dihet se në Kosovë ka mungesë të theksuar të energjisë elektrike sidomos në largësi gjeografike nga KEDS.
“Barrierat dhe pengesat me të cilat përballen bizneset gjatë zhvillimit të aktivitetit të tyre ditore përbëjnë aspekte të ndryshme dhe janë të llojllojshme. Ndër vështirësitë më të shpeshta me të cilat ballafaqohen bizneset në aktivitetin e tyre ditore operacionale është rryma elektrike, infrastruktura e keqe, konkurrenca jo lojale, mungesa e sundimit të ligjit, si dhe niveli i lartë i taksave”, thotë Beqiri.
Ai mendon se një nga kushtet esenciale për funksionimin normal të ndërmarrjeve të vogla dhe të mesme është furnizimi i bollshëm me energji elektrike. Sipas tij, mungesa e furnizimit me energji elektrike ka penguar në masë të madhe konkurrencën e ekonomisë kosovare.
“Pothuajse të gjitha anketat e bëra me biznese kanë identifikuar furnizimin e pasigurt të energjisë elektrike si njërën prej pengesave kryesore në zhvillimin e tyre. Republika e Kosovës ballafaqohet me reduktime të rrymës, përderisa qëndron në rezervat e treta të linjitit në Evropë”, theksoi Beqiri.
Ai thotë se edhe më tutje mbesin sfida të mëdha për t’u adresuar në lidhje me implementimin e ligjeve dhe politikave të energjisë, duke përfshirë zbatimin e pagesave të rrymës, menaxhimin e kërkesës duke harmonizuar tarifat me koston dhe krijimin e kushteve për investime të jashtme në industrinë e energjisë së Kosovës si bazë për zhvillim ekonomik.
“Thënë shkurt është i mirëseardhur një projekt i tillë, në Kosovë bukur shumë përdoret kjo lëndë djegëse andaj do të ulë edhe më shumë koston familjar dhe atë të bizneseve”, u shpreh Beqiri. /tesheshi.com/
