Ndërsa ditë më parë e kanë pohuar bashkimin me përfaqësuesen e Kosovës lojtarë të tillë si Rashica, Meha e Shala, shtypi sportiv e më gjerë lajmëron për të tjerë emra që bëjnë të njëjtën gjë.
Valdet Rama e Besart Berisha bëhet e ditur të jenë po ashtu në rrugën për të veshur fanelën e Kosovës në kualifikueset për Botërorin 2018.
Rama ende nuk ka një destinacion të qartë në nisje të sezonit, pasi është pa skuadër. Ai ka qenë më herët një lojtar i parapëlqyer te kombëtarja shqiptare, por dëmtimet e njëpasnjëshme do ta pengonin atë të luante rregullisht. Çka do të reflektohej dhe në pjesëmarrjen e munguar te kuqezinjtë në fushatën kualifikuese të Europianit.
Ndryshe tij, Besart Berisha, luan në Australinë e largët, ku dhe ka patur një karrierë të suksesshme. Largësia, por edhe një qëndrim i ftohtë fillimisht i lojtarit, nuk sollën një bashkim të tij me përfaqësuesen e Shqipërisë në epokën e De Biazit. Nga sa mësohet, ai ka zgjedhur gjithashtu të luajë me Kosovën.
Përndryshe, një portal kosovar flet dhe për katër lojtarë të tjerë me emër që do t’i thonë “po” Kosovës. E bëhet fjalë pikërisht për Xherdan Shaqirin, Granit Xhakën, Shani Tarashajn e Adnan Januzajn.
Ndërkohë që kjo prirje e lojtarëve që kanë luajtur me Shqipërinë apo me përfaqësuese të tjera për t’i bashkuar përfaqësueses së Kosovës duket se nuk do të ndalet në ditët në vazhdim, mes artikullshkruesve në dy anët e kufirit ka nisur një betejë mbi këtë dukuri të pritshme.
Një artikull këtej kufirit mbi largimin e Milot Rashicës, i përshkruar me ngjyrime negative, ka sjellë reagimin e kolumnistëve kosovarë, që nuk kanë përtuar të përdorin një gjuhë njësoj të ashpër.
“Tradhti” është një ndër fjalët e përdorura rëndom në analizat për largimet e futbollistëve, por e parë në këndvështrime të ndryshme.
Sherri pritet të vazhdojë gjatë, pasi në ditët e ardhshme priten surpriza të tjera, edhe pse duhet thënë që deri tani nuk ka asnjë zë për largim të lojtarëve të formacionit bazë të kuqezinjve drejt përfaqësueses së Kosovës.
Kosova do të marrë pjesë në eliminatoret për botërorin e 2018-tës. Ajo gjendet në grupin I, së bashku me Kroacinë, Finlandën, Islandën, Turqinë dhe Ukrainën. Takimi i parë i Kosovës do të jetë më 5 shtator, kur të ndeshet me Finlandën. /tesheshi.com/
