Atmosfera në “Loro Boriçi” ka qenë mjaft miqësore në përballjen mes Kosovës dhe Turqisë, një ndeshje e vlefshme për grupin I të eliminatoreve të Kupës së Botës.
Por nuk ka qenë po kaq miqësor rezultati përfundimtar për Kosovën, që ka humbur 1-4.
Kjo ishte humbja e pestë për këtë përfaqësuese të re në grupin I, në të parat eliminatore të saj. Një pjesë të lojës do të kishte një barazim shpresëdhënës, por nga minuta e 31-të e tutje ndeshja do të fliste vetëm për turqit.
Volkan Şen do t’i kalonte turqit në epërsi në minutën e 6-të, e Rrahmani do të barazonte në të 22-tën. Cengiz Ünder do të gjente rrjetën për turqit në minutën e 31-të, pasuar në pjesën e dytë nga golat e Burak Yılmaz-it dhe Ozan Tufan-it.
“Mbrëmja e të rinjve,” shkruan e përditshmja turke Sabah në lidhje me këtë ndeshje. Turqit vinin nga tronditja prej largimit të Arda Turan-it, por nuk shfaqën probleme në fushë.
Kosova mban vendin e fundit në grupin I, me 1 pikë pas një barazimi e pesë humbjesh. Turqia, në anën tjetër, ngjitet në vend të tretë, me 11 pikë, dy më pak se Kroacia dhe Islanda kryesuese. /tesheshi.com/
