Nuk do të ketë në negociatat për paqe diskutime mbi fatin e Beshar Esadit, presidentit sirian. Kështu pretendon delegacioni që përfaqëson regjimin në këto negociata.
Beshar Xhaferi, kryetari i delegacionit të qeverisë siriane, e ka përjashtuar tërësisht diskutimin mbi këtë çështje, duke thënë se presidenti Esad nuk ka të bëjë aspak me bisedimet. Përndryshe, përparësi e qeverisë siriane, ka deklaruar drejtuesi i delegacionit, mbetet përpjekja kundër terrorizmit.
Ai ka folur për gazetarët para nisjes së javës së dytë të bisedimeve për paqe, duke u treguar i prerë në vendosmërinë për të mos e përfshirë çështjen e Esadit në negociatat vijuese:
“(Termat) e referencës së bisedimeve tona nuk flasin fare për çështjen e presidentit të Republikës Arabe Siriane. Kjo është diçka e përjashtuar tashmë.”
Tranzicioni politik në Siri dhe pozicioni i Esadit janë dy çështje fundamentale në përpjekjet për t’i dhënë fund konfliktit sirian, ndërsa vendosmëria e delegacionit të regjimit për të mos i bërë ato pjesë të bisedimeve nuk lajmëron zhvillime pozitive.
I këtij mendimi ka qenë dhe i dërguari i posaçëm i OKB-së për Sirinë, Staffan de Mistura, që ka deklaruar se ky refuzim mund të çojë në një përkeqësim të situatës në terren.
Bisedimet e paqes mes palëve ndërluftuese në Siri janë në javën e tyre të dytë, por ende nuk është shënuar asnjë hap inkurajues. /tesheshi.com/
