Të dërguarit e opozitës siriane në bisedimet e paqes në Gjenevë kanë vendosur ta pezullojnë pjesëmarrjen e tyre në shenjë proteste ndaj përkeqësimit të situatës humanitare në Siri dhe problemeve që kanë të bëjnë me ndërprerjen e luftimeve.
Rijad Hixhabi, drejtuesi i koalicionit opozitar, e ka quajtur të papranueshme që bisedimet të vazhdojnë ndërsa forcat e Esadit vazhdojnë t’i bombardojnë dhe t’i vdesin urie civilët në Siri.
Ai ka deklaruar se regjimi sirian dhe aleatët e tij i kanë përdorur bisedimet si pretekst për të vijuar fushatën ushtarake. Zonat civile, sipas tij, mbeten ende të rrethuara nga trupat qeveritare.
I dërguari i OKB-së për Sirinë, Staffan de Mistura, bëri të ditur dje se delegacioni i koalicionit të opozitës siriane do të qëndrojë në Gjenevë, por nuk do të marrë pjesë në negociatat.
“Qëllimi i tyre është të qëndrojnë në Gjenevë në hotel, e mbase, me sugjerimin tim, t’i ndjekin diskutimet teknike me mua dhe me ekipin tim,” ka sqaruar De Mistura.
Bisedimet kanë kohë ende përpara, në këndvështrimin e ndërmjetësit të OKB-së, e askush nuk duhet të presë një mrekulli në pak ditë.
“Ne nuk duhet të presim, dhe askush nuk duhet të presë, që pas pesë vitesh konflikt, një tranzicion politik të zgjidhet mrekullisht brenda një jave.”
Marrëveshja për ndërprerjen e luftimeve në shkurt i ka rezistuar kohës në të shumtën e saj, por palët në konflikt e kanë akuzuar njëra-tjetrën për shkelje të armëpushimit. Në Halep njoftohet të ketë patur luftime në fundjavë, dhe sipas raportimeve të Observatorit Sirian për të Drejtat e Njeriut, janë vrarë 22 civilë. /tesheshi.com/
