Ministri i Shëndetësisë, Ilir Beqaj, ka raportuar sot në komisionin parlamentar të shëndetësisë, dhe i tërë debati është përqendruar te shkurtimet në këtë sektor.
Beqaj ka folur për një shkurtim të personelit me 338 persona në të gjithë shërbimin spitalor në vend. Siç ka bërë të ditur ministri, shkurtimi i stafit mjekësor do të jetë me 5%, ndërsa i personelit jomjekësor do të jetë 20%.
I fortë ka qenë reagimi i deputetit të LSI-së, Petrit Vasili, që e ka shprehur hapur kundërshtinë ndaj shkurtimeve në shërbimin spitalor:
“I vetmi kompromis që nuk e kam bërë dot kur isha ministër, ishte të hiqja personel. Në të gjitha rastet e historive kur administrata ka pasur nevojë, shëndetësia nuk është shkurtuar… Shkurtimet ka qenë traumatike sa herë që kanë ndodhur.”
Në të njëjtën linjë ka qenë dhe përfaqësuesja e PD-së, deputetja demokrate dhe kryetarja e komisionit, Albana Vokshi, “Kjo është fushatë spastrimesh me personelin. Punonjësit do të zëvendësohen me militantë. Mos mashtroni zoti ministër, pasi janë 600 familje që po u hiqni bukën e gojës.”
Ajo ka aluduar në fjalën e saj dhe për një shtëpi që po ndërtohet në Peruxhia, “A kanë lidhje këto fonde që po shkurtohen me një shtëpi që po ndërtohet në Peruxhia?”
Ministri nuk ka ngurruar t’i përgjigjet flakë për flakë Vokshit, duke i kujtuar problemet e saj, “Keni ca kohë që keni probleme me shtëpinë time, por problemet e shtëpisë time nuk i zgjidh dot. Zgjidh problemet e tua, se ke probleme shtëpie.”
Ministria e Shëndetësisë, e vetë ministri Ilir Beqja, janë prej kohësh në shënjestrën e kritikave të opozitës, posaçërisht të PD-së, por atyre u janë bashkuar herë pas here dhe zëra nga LSI-ja. /tesheshi.com/
