Roy Hodgson, trajneri i Anglisë, vendosi të përfshijë në 23 lojtarët që do të marrë në Francë dhe 18-vjeçarin Marcus Rashford.
Sulmuesi i Mançester Junajtedit la mbresa në javët e fundit të kampionatit anglez, por gjithashtu shënoi dhe në debutimin e tij ndërkombëtar, në fitoren e Anglisë të premten ndaj Australisë.
Fatkeqë kanë qenë Andros Townsend i Njukasëllit dhe Danny Drinkwater i Lestërit. Vendimi për lënien jashtë listës u është transmetuar nga vetë trajneri, ndrsa të dy i kanë përshëndetur të gjithë lojtarët përpara se të largohen. Fabian Delph është lënë gjithashtu në listën rezervë pas një lëndimi.
Mungesa e madhe te gjermanët do të jetë Marco Reus i Borusias së Dortmundit, i cili ka probleme me dëmtimet. Ai mungoi dhe dy vite më parë, në Kupën e Botës. Ndërkohë, edhe pse nuk luan që nga marsi, Bastian Schweinsteiger është shtënë në listën përfundimtare.
Mes të munguarve janë Julian Brandt, Karim Bellarabi dhe Sebastian Rudy.
Te përfaqësuesja franceze do të mungojnë në këtë Europian Varane dhe Mathieu, që të dy të dëmtuar, të zëvendësuar nga Adil Rami dhe Samuel Umtiti.
Mamadou Sakho nuk është grumbulluar, edhe pse pezullimi për përdorim të lëndëve të ndaluara i ka mbaruar. Benzema e Valbuena dihet tashmë prej kohësh që nuk do të jenë me “gjelat” në këtë aktivitet.
Befasues ka qenë vendimi i teknikut turk Fatih Terim, që ka përfshirë në listën e 23 lojtarëve një 18-vjeçar që deri më tash ka luajtur për përfaqësueset daneze të moshave. Emre Mor do të jetë në Francë si zgjedhja më e papritur në kombëtaren turke, ndërsa janë lënë jashtë Gökhan Tore, Alper Potuk, Yasin Öztekin, Serdar Aziz, Mahmut Tekdemir, Çaglar Söyüncü, Ali Şaşal Vural dhe Mevlüt Erdinç.
Roman Neustadter dhe Guilherme, dy lojtarë me kombësi të huaj, kanë arritur të bëhen pjesë e listës së përfaqësueses ruse. Mes 23 lojtarëve nuk janë përfshirë Alan Dzagoev, Yuri Zhirkov dhe Aleksandr Kerzhakov.
Një numër përfaqësuesesh të tjera pritet që t’i publikojnë në orët në vazhdim të kësaj të marte listat përfundimtare të lojtarëve. /tesheshi.com/
