Dy përfaqësueset e shqiptarëve do të luajnë sonte në të njëjtën orë në eliminatoret për Kupën e Botës të dy viteve më pas.
Në “Loro Boriçi” do të ndeshen Kosova e Kroacia, një takimi i vlefshëm për grupin I të eliminatoreve europiane, e në “Rheinpark Stadion” të Vaduzit përballen Lihtenshtajni dhe Shqipëria për grupin G.
Kosova do ta ketë mjaft të vështirë ndaj Kroacisë. Dy ekipet vijnë pas barazimeve 1-1 në takimet e para, Kosova në debutimin e saj ndaj Finlandës, e Kroacia ndaj Turqisë.
Te Kroacia do të mungojnë dy ideatorët e lojës, Modriç e Rakitiç, por dhe Lovren; mungesa që punojnë në të mirë të Kosovës.
Duke patur parasysh forcën e kundërshtarit, barazimi do të ishte rezultat i pranueshëm për Kosovën, madje goxha i mirë.
Ndërkohë që Shqipëria e ka detyrim fitoren ndaj Lihtenshtajnit. Asnjë rezultat tjetër nuk do të ishte i pranueshëm për kuqezinjtë, që tre ditë më pas do të presin Spanjën.
Mungesa kryesore te Shqipëria është Armando Sadiku, një prej lojtarëve më në formë, por që problemet fizike e penguan të jetë në këto dy sfida.
Përfaqësuesja e Shqipërisë vjen në këtë takim pas fitores 2-1 ndaj Maqedonisë. Ndryshe kundërshtarit, që humbiste 8-0 një muaj më parë ndaj Spanjës.
De Biazi ka deklaruar në konferencën e shtypit se është gati të pranojë dhe një fitore minimale, aq delikat e sheh takimin.
Se ç’do na sjellin dy sfidat e orës 20:45 nuk dihet natyrisht. Ajo që urojmë është të ketë fitore për të dy përfaqësueset. /tesheshi.com/
