Nga Blendi Gashi
Jo vetëm brenda seancave plenare zhvillohet luftë e ashpër mes mazhorancës e opozitës, por ajo shpesheherë më e egër është brenda Kryesisë së Kuvendit dhe komisioneve parlamentare ku çdo gjë trajtohet para se të shkojë më pas në seancat që i sheh edhe publiku.
Një luftë për kryetarllak së fundmi është zhvilluar edhe në mbledhjen e Kryesisë të mbajtur të martën ku temë diskutimi ishte formimi i Komisionit Parlamentar për Stabilizim Asociim, konkretisht zgjedhja e kryetarit dhe nënkryetarëve.
“Rebelimi” i opozitarëve ndodhi në momentin që Kryesia vendosi që ky komision të udhëhiqet nga pozita dhe udhëheqës i delegacionit të jetë Xhavit Haliti, duke kërkuar që komisionet që lidhen me përfaqësimin ndërkombëtarë të mos drejtohen veç nga pozita por edhe nga opozita.
Shefi i grupit parlamentar të Vetëvendosje-s, Glauk Konjufca, në shenjë proteste u largua nga mbledhja me arsyetimin se u vendos me mbivotim që komisioni për Stabilizim Asociim të udhëhiqet nga pozita.
Për më tepër udhëheqjen e këtij komisioni nga Haliti e quan diç të shëmtuar.
“Kjo është e gërditshme dhe e shëmtuar që nënkryetari i PDK-së të jetë udhëheqës i delegacioneve ma të rëndësishme të Kuvendit, atë të delegacionit në NATO, Parlament Evropian dhe Këshillin e Evropës. Do ta shqyrtojmë me LDK-në se si do të veprojmë më tutje, nëse do të vazhdojmë të jemi pjesë e komisionit”, ka thënë Konjufca.
Të pakënaqur me vendimin e Kryesisë janë shprehur edhe grupi parlamentar i LDK-së, ku përmes një komunikate për media, ka kërkuar që të respektohet Rregullorja e Kuvendit lidhur me Komisionin Parlamentar për MSA – në.
“Në kundërshtim me çdo praktikë parlamentare, shumica parlamentare me mbivotim e caktoi përbërjen dhe kryesimin e delegacionit. Sipas praktikës për themelimin e komisioneve parlamentare, përbërja e komisionit duhet të reflektojë madhësinë e grupeve parlamentare në Kuvendin e Kosovës. Ndërkaq, kryesuesi dhe zëvendës-kryesuesit e këtij komisioni duhet të caktohet sipas formulës që përdoret në shpërndarjen e kryesimit të komisioneve parlamentare”, thotë LDK.
Sipas partisë së Isa Mustafës, çdo formë tjetër e caktimit të anëtarëve, kryesuesit dhe zëvendës-kryesuesve të këtij komisioni parlamentar “bie në kundërshtim me rregulloren e Kuvendit dhe nuk do të përkrahet nga grupi i tyre parlamentar.
Kjo parti vlerëson se ky komision është i rëndësisë së veçantë.
“Prandaj, përbërja dhe kryesimi i tij duhet të reflektojnë një koncensus të përgjithshëm politik të forcave politike në Kuvendin e Kosovës”, thotë LDK përmes komunikates.
Por shefi i grupit parlamentar të PDK-së Memli Krasniqi thotë se edhe pse nuk e parasheh rregullorja i kanë dhënë hapësirë tre përfaqësuesve të VV-së, tre përfaqësuese të LDK, tre PDK dhe vetëm nga një grupeve tjera parlamentare për të qenë pjesë e delegacionit.
Ja ç’thotë Neni 63 i Rregullores së Kuvendit:
Emërimi i kryetarëve dhe i nënkryetarëve të komisioneve
1. Anëtari i Kryesisë nuk mund të jetë kryetar i Komisionit parlamentar.
2. Kryesia e Kuvendit kërkon nga secili grup parlamentar, i përfaqësuar në Kuvend, t’i propozojë kryetarët, zëvendëskryetarët dhe anëtarët e komisioneve.
3. Një deputet nuk mund të jetë kryetar në më shumë se një komision.
4. Ministri ose zv/ministri nuk mund te jetë anëtar i komisionit parlamentar.
5. Grupet parlamentare i propozojnë kryetarët për komisione, në përputhje me marrëveshjen e arritur në Kryesi. Në marrëveshjen për caktimin e posteve për kryetarë të komisioneve, Kryesia e merr parasysh proporcionin e forcës së grupeve parlamentare.
6. Për postin e kryetarit të Komisionit për të Drejtat dhe Interesat e Komuniteteve dhe Kthim, propozimi bëhet nga grupet parlamentare të një komuniteti, përveç komunitetit të shumicës. /tesheshi.com/
