Kryediplomati evropian Josep Borrell njoftoi në Teheran se negociatat midis Iranit dhe fuqive të mëdha për çështjen bërthamore do të rifillojnë “në ditët në vijim”.
“Qëllimi im kryesor ishte të thyej dinamikën aktuale, që është dinamika e përshkallëzimit dhe të nxirrja negociatat nga ngërçi”, tha Borrell në një konferencë shtypi.
Më pas ai njoftoi se negociatat do të rifillonin në Vjenë “gjatë ditëve të ardhshme”, pas një pauze prej më shumë se tre muajsh.
“Kanë kaluar tre muaj dhe duhet të përshpejtojmë punën. Jam shumë i lumtur me vendimin që u mor në Teheran dhe Uashington”, tha Borrell.
Ministri i Jashtëm iranian Hossein Amirabdolahian tha në një konferencë të përbashkët shtypi se bisedimet ndërmjetësuese të Iranit me Shtetet e Bashkuara për ringjalljen e marrëveshjes bërthamore të vitit 2015 do të fillojnë së shpejti.
“Ne jemi të gatshëm të rifillojmë negociatat në ditët në vijim. Ajo që është e rëndësishme për Iranin është të marrë përfitimin e plotë ekonomik nga marrëveshja e vitit 2015”, tha Amirabdolahian, duke shtuar se ai pati një “takim të gjatë por pozitiv” me Borrell. /tesheshi.com/
