Përdhunimet e serbëve gjatë luftës: i dënari i parë pas 22 vitesh

Gjykata Themelore në Prishtinë ka dënuar me 10 vjet burgi ish-rezervistin e policisë serbe Zoran Vukotiç, për kryerjen e veprës penale të dhunës seksuale gjatë luftës në Kosovë.

Ky është rasti i parë që dikush dënohet për një krim të tillë nga gjykatat e Kosovës.

Prokuroria Speciale e Kosovës kishte ngritur aktakuzë kundër Vukotiçit në mars të vitit 2020.

Sipas njoftimit te Prokurorisë, Vukotiç, “më 22 maj 1999, në bashkëkryerje me pjesëtarë të tjerë të forcave ushtarake, policore dhe paramilitare serbe, në territorin e komunës së Vushtrrisë, ka marrë pjesë në dëbimin e popullatës civile shqiptare, kryerjen e dhunës fizike dhe psikike ndaj tyre si dhe, me përdorimin e dhunës dhe veprimeve të tjera çnjerëzore, ka kryer dhunim seksual, si pjesë e një sulmi të gjerë dhe sistematik ndaj gruas së nacionalitetit shqiptar”.

Ministrja e Drejtësisë, Albulena Haxhiu e cilësoi si dënimin e Vukoviçit si “lajm të mirë për të gjitha viktimat e dhunës seksuale të luftës, për qytetarët, por edhe për historinë dhe të ardhmen e Kosovës”.

“Drejtësia për krimet e luftës do të bëhet dhe për këtë do të angazhohemi çdo ditë”, shkroi Haxhiu.

Ndërkaq, sipas Qendrës Kosovare për Rehabilitimin e të Mbijetuarve të Torturës (QKRMT), dënimi i Vukotiçit shënon “një moment kthese dhe shprese”, jo vetëm për viktimën që ka dëshmuar kundër tij , por edhe për të mbijetuarit e tjerë “që një ditë drejtësia do të vihet në vend”. /tesheshi.com/