Përdhoset dhe thyhet rëndë lapidari i 14 dëshmorëve të kombit të Zonës Operative të Llapit të UÇK-së, që gjendet në Kodrën mbi fshatin Kaçandoll të rajonit të Shalës së Bajgorës.
Ky lapidar është i vendosur pikërisht në vendi ku këta luftëtarë ranë gjatë luftimeve me okupatorin serb, gjatë luftës së vitit 1998-99.
Veteranët e luftës së UÇK-së shprehin keq ardhje për atë se çfarë ka ndodhur me lapidarin e dëshmorëve të Llapit.
Rafet Ibishi, kryetar i degës së veteranëve të UÇK-së të Zonës Operative të Shalës e ka dënuar ashpër këtë akt.
“Thyerja e lapidarit të UÇK-së është akt mizor, kriminal e barbar, i drejtuar direkt kundër vlerave të UÇK-së e gjakut të dëshmorëve të Kombit”, ka thënë Ibishi.
“Nuk dua të komentoj mbi atë se kush ka venë dorë mbi ata që dhanë jetën për lirinë e Kosovës, por si kryetar i shoqatës së veteranëve të lulftës së UÇK-së, kërkojë nga Policia e Kosovës që sa ma parë t’i zbulojë autorët e këtij akti dhe t’i dërgojë para drejtësisë”, ka shtuar ai.
Policia e Kosovës në Mitrovicë ka konfirmuar rasti e dëmtimit të Lapidarit të UÇK-së, por pa mundur dot të japë informacion te detajuar mbi autorët.
Zëdhënësi i Policisë së Kosovës për rajonin e Mitrovicës, Avni Zahiti, tha pasi është ka pranuar informacioni për dëmtimin e lapidarit të 14 luftëtarëve, është dalë në vendin e ngjarjes dhe janë kryer të gjitha procedurat për vijimin e hetimeve.
Zahiti ka shtuar se policia ka marrë disa shenja në oborrin e lapidarit,tanimë të dëmtuar. “Tani për tani nuk kemi ndonjë person të dyshuar”, ka thënë zëdhënësi i policisë për rajonin e Mitrovicës.
Dëmtimet të lapidarëve të pjesëtarëve të UÇK-së, kanë ndodhur edhe në pjesë të tjetra të Kosovës vite më parë, por deri më tani policia e Kosovës nuk ka arrestuar asnjë person.
Lapidari i dy dëshmorëve të UÇK-së në afërsi të Komunës së Shtërpcës tek fshati Brod, është dëmtuar në dy raste dhe për këtë dyshohen se e kanë kryer pjesëtarë të komunitetit serb.
Po ashtu në afërsi të Kaçanikut, në vendin ku lidhet rruga e Shtërpcës me magjistralen e për në Kaçanik, janë dëmtuar nga persona të pa njohur varrezat e dëshmorëve të kombit duke shkruar në to katër S-ja serbe. Edhe për këtë rast dyshohet se këtë vepër e kanë bërë pjesëtarë të komunitetit serb.
Ndërsa rasti i dëmtimit të lapidarit të 14 pjesëtarëve të UÇK-së në fshatin Kaçandoll të rajonit të Shalës së Bajgores, këtë akt dyshohet se e kanë kryer shqiptarët, pasi që kjo pjesës e Kosovës dhe Mitrovicës është e banuar vetëm me popullatë shqiptare. /tesheshi.com/
