Pas shpërthimit të zjarreve në Shqipëri, Mal të Zi dhe Kroaci, presidenti Hashim Thaçi u ka ofruar këtyre shteteve ndihmë shtetërore me ekipet e Forcës së Sigurisë së Kosovës për menaxhimin e zjarreve.
Kjo gatishmëri për t’u dalë në ndihmë këtyre shteteve mike, autoriteteve përkatëse u është përcjellë përmes ambasadave të Kosovës. Këtë gjë e kanë konfirmuar edhe vetë kabineti i presidentit Thaçi.
“Po, presidenti Thaçi, pas koordinimit me komandantin e FSK-së, Rrahman Rama, duke marrë parasysh gjendjen e jashtëzakonshme me zjarret që kanë përfshirë shtetet mike, konkretisht Shqipërinë, Malin e Zi dhe Kroacinë, përmes ambasadave tona ka shprehur gatishmërinë që t’u ofrojë ndihmën e ekipeve profesionale të FSK-së për menaxhimin e zjarreve, nëse ato kanë nevojë për mbështetje shtesë”, ka konfirmuar këshilltari politik i presidentit Thaçi, Bislim Zyrapi, për gazetën “Zëri”.
Njësia i Emergjencave e FSK-së ka marrë shumë mirënjohje ndërkombëtare për reagime të shpejta dhe profesionale. Ajo vlerësohet si njëra prej njësive më të përgatitura në Kosovë dhe rajon. /tesheshi.com/
