Kryetari i Vetëvendosjes, Visar Ymeri, ka dhënë intervistën e parë pas shpërthimit të një skandali të brendshëm në partinë e tij.
Ndonëse ka mohuar zërat për ndarjen e kësaj partie, ai ka pranuar se ekzistojnë mospajtime ndërmjet individëve të caktuar.
Por Ymeri tha askush nga ata nuk duhet ta shohë veten më të rëndësishëm se organizata
“Asnjë njeri nuk duhet ta shoh vetën më të rëndësishëm sesa organizatën, asnjëri. Lëvizja Vetëvendosje mundet të ecë përpara me gjithë ne. Albin Kurti e ka një kontribut të pazëvendësueshëm për Lëvizjen, këtë kurrkush nuk po ia mohon. Çka po them unë, organizata politike dhe veçanërisht ideja që LVV po do ta paraqesë është se njerëzit janë zbatues të kësaj ideje dhe në funksion të saj”, ka thënë Ymeri në “Rubikon” të KTV-së.
Më tej, Ymeri ka thënë se është i gatshëm të jap dorëheqje nga posti i kryetarit nëse kjo bën që të zgjidhet situata në të cilën gjendet VV.
“Mendoj që duhet dikush tjetër por këtë natyrisht se duhet ta diskutojnë edhe të tjerët. Është diçka që duhet ta diskutojnë edhe të tjerët. Do të kisha qenë i lumtur dhe të heq dorë nga udhëheqja vetëm që t’i jap zgjidhje situatës. Do të bëj çdo gjë që më kërkohet vetëm nëse kjo është në të mirë të Vetëvendosjes”, ka thënë ai.
Ai ka bërë të ditur se së fundmi nuk ka pasur as një komunikim me themeluesin e partisë, Albin Kurti. Në bisedat që kishte më parë, Ymeri thotë se Kurti nuk kishte ambicie për kryetar mirëpo nuk e dinë nëse ka ndryshuar mendim karshi kësaj
Ymeri bëri të ditur se në mbledhjen e mbajtur, Shpend Ahmeti e Dardan Molliaj treguar publikisht se nuk kanë ambicie për postin e të parit të partisë.
“Edhe Dardan Molliqaj edhe Shpend Ahmeti kanë deklaruar publikisht se nuk janë të interesuar apo të garojnë për kryetar të partisë, se nuk kanë ambicie për të garuar si kryetar. Dardan Sejdiu ma ka ofruar dorëheqjen e tij. Doli se është dorëhequr, jo, ai ma ka ofruar dorëheqjen. Një numër i caktuar i njerëzve në lëvizjen vetëvendosje, duke e parë çka po ndodh brenda Lëvizjes, ata janë të gatshëm të ofrojnë dorëheqje nga secila detyrë udhëheqëse nëse ajo ndikon në përmirësimin e gjendjes. Jo, ata vetëm e dëshmojnë se nuk kanë ambicie për pushtet. Molliqaj ka ofruar publikisht që është i gatshëm të dorëhiqet edhe nga posti i deputetit nëse kjo është ajo që po kërkohet nga pala tjetër, nëse kjo është ajo që i garanton Lëvizjes Vetëvendosje dy gjëra, ajo që i mundëson Vetëvendosjes demokratizimin apo vazhdimin e demokratizimin dhe në anën tjetër që garanton unitetin”, Ymeri. /tesheshi.com/
