Nga Blendi Gashi
Ndërsa Albin Kurti sot zyrtarisht do rikthehet në pozitën e kryevetëvendosësit, së fundmi ish-sekretari Dardan Molliqaj dhe aktuali Ismail Kurteshi janë përplasur keq mes vete, duke akuzuar njëri-tjetrin për përçarjen në Vetëvendosje.
Molliqaj edhe pse në letrën e dorëheqjes nga pozita e sekretarit deklaroi se po e ndërmerr këtë hap “për t’ju përkushtuar funksionit të deputetit”, me kalimin e kohës po del të jetë e pavërtetë.
Dhe pikërisht largimi nga kjo pozitë e Molliqajt po del të jetë “sherri” i vërtetë i përçarjes. Dhe kjo po shpërfaqet me akuzat që ky i fundit ja mveshi Kurteshit, për mënyrën se si po e drejton Sekretariatin e partisë.
E gjithë përplasja mes tyre nisi pas një deklarate të Kurteshit i cili akuzoi Molliqajn për organizimin të takimeve “ilegale” me aktivistët e Vetëvendosjes ku sipas tij ju ka folur për ndarje në dysh të partisë.
Dhe nuk vonoi erdhi reagimi i Molliqajt i cili deklaratën e Kurteshit e quajti antidemokratike, me shumë të pavërteta që përmbajnë gjuhë përçarëse.
“Në kohën kur ne po i diskutojmë dallimet tona brenda organizatës dhe anëtarëve e simpatizuesve të Lëvizjes po ua rrisim shpresat që së bashku do ta tejkalojmë problemin e brendshëm në organizatën tonë, ushtruesi i detyrës së Sekretarit Organizativ, Ismajl Kurteshi, lëshon deklarata antidemokratike me shumë të pavërteta që përmbajnë gjuhë përçarëse. Dy takime i kemi mbajtur me strukturat e Lëvizjes në Pejë dhe Deçan. Të parin në një restorant ndërsa të dytin në zyra të Lëvizjes. Qëllimi i këtyre takimeve ka qenë diskutimi i gjendjes në të cilën gjendet Lëvizja dhe jo ajo që pretendohet në deklaratën e Kurteshit. Duke qenë se unë jam pjesë e Lëvizjes dhe deputet i saj, nuk e di në çka thirret Kurteshi kur takimin tonë e quan ‘takim ilegal’. Meqenëse këto ditë janë thirrur shumë në statutin e Lëvizjes, pres nga ai që të përgjigjet se cila pikë e këtij statuti ndalon takime të tilla ose i vlerëson ato si ”ilegale”. Ende më problematike për mua është që Kurteshi këtë gjuhë po e përdorë pothuajse çdo ditë në secilin takim me anëtarë, në të cilat takime ai po e shoqëron kandidatin për kryetar të Lëvizjes, Albin Kurtin”, tha Molliqaj në reagimin e tij.
Kurteshi nuk u ndal dhe ju kundërpërgjigj Molliqajt me ç’rast tha se nuk ka kontestuar vizitën e Molliqajt me strukturat e VV-së por përpjekjen që t’i ndajë aktivistët nga partia.
“Me 18 janar, pas ankesave të disa aktivistëve të Vetëvendosjes se deputeti dhe anëtari i Lëvizjes Vetëvendosje, z. Dardan Molliqaj, po i takon strukturat në disa Qendrave të Vetëvendosjes dhe në këto takime po fol për ndarjen e Vetëvendosjes dhe themelimin e një partie të re. Bazuar në përgjegjësit që aktualisht i kam në Lëvizjen Vetëvendosje kam menduar se është obligim i imi zyrtar të reagoj. Në reagimin tim unë në asnjë mënyrë nuk e kamë kontestuar vizitën e z. Molliqaj në qendrat e Lëvizjes Vetëvendosje, edhe pse në Lëvizje aktivitetet zakonisht bëhen në koordinim me Kryesin ose Sekretariatin e Përgjithshëm. Unë nuk e kam kontestuar as debatin me aktivist e as mendimin e tij kundër në çfarëdo situate. Unë do ta quaja legjitim edhe angazhimin e tij për themelimin e një subjekti të ri politik si dhe përpjekjen e tij që t’i bind aktivistët e Vetëvendosjes që t’i bashkohen subjektit të tij, por vetëm pasi të ishte larguar nga Vetëvendosja. Unë e kam quajtur dhe vazhdoj ta quaj ilegale, (kundër statusore), përpjekjen e tij që t’i ndaj nga Vetëvendosja aktivistët tanë derisa ai është anëtar i Lëvizjes, sepse kjo nuk është as statusore dhe as e moralshme”, thotë Kurteshi.
Ai më pas ironizon me Molliqajn ku thotë se e ka mundësinë që të veproj nën çatinë e vjetër ose ta ndërtoj një të re.
“Kjo varet prej tij, ajo që unë po kërkoj nga ai është respektimi i Statutit, në hartimin e të cilit kontribuoj edhe ai vet, deri sa deklarohet se është anëtar i Lëvizjes Vetëvendosje”, thotë Kurteshi.
Kësaj deklarate ende nuk ka reaguar Molliqaj, por në ditët në vijim do mësohet nëse ai së bashku me Visar Ymerin dhe të tjerët do të ndërtojnë një çati të re, e sipas të gjitha gjasave kjo do të ndodhë. /tesheshi.com/
