Në Ligën e Europës janë përcaktuar gjithashtu skuadrat çerekfinaliste në tetë ndeshje të luajtura mbrëmjen e së enjtes.
Rezultati më i papritur ka qenë ai në Romë, mes Lacios dhe Spartës së Pragës. Çekët kanë fituar 0-3, dhe janë kualifikuar për më tej falë dhe barazimit 1-1 në ndeshjen e parë. Eliminimi i Lacios e lë Serinë A italiane pa asnjë përfaqësuese të sajën në Ligën e Europës.
Ndërkaq, vëmendja ka qenë e përqendruar mbrëmë në “Old Trafford”, në përplasjen mes dy skuadrave angleze me emër, Mançester Junajtedit dhe Liverpulit. Miqve u jepte siguri fitorja 2-0 e takimit të parë, e cila u vu në dyshim në minutën e 32-të, kur Martial shënoi me 11-metërsh për vendasit. Coutinho vuri barazpeshën në fushë në fundin e pjesës së parë. Rezultati 1-1 nuk ndryshoi gjer në fund të lojës, duke i dhënë të drejtë Liverpulit të vijojë rrugëtimin.
Borusia e Dortmundit e fitoi dhe takimin e dytë në Londër ndaj Totenhemit. Rezultatit 3-0 të ndeshjes së
parë iu bashkangjit ai 1-2 në të dytën. Dy golat e gjermanëve mbajnë firmën e të zakonshmit tashmë Aubameyang.
Në ballafaqimin spanjoll, Atletik Bilbao eliminoi Valencian. Në “Estadio de Mestalla”, Valencia fitoi 2-1, por kjo nuk mjaftoi për ta kualifikuar. Bilbao e kishte mbyllur takimin e parë 1-0 në favorin e vet, dhe goli në fushë kundërshtare i mundësoi kualifikimin. Eliminimi i vë kapak sezonit jo pozitiv të Valencias.
Shakhtari i Donjeckut fitoi 0-1 në Belgjikë ndaj Anderlehtit, dhe u kualifikua me rezultatin e përgjithshëm 4-1. Sevilja shpartalloi 3-0 Bazelin, ndërsa sfida e mëhershme kishte përfunduar 0-0, çka i bëri spanjollët çerekfinalistë. Sporting Braga fitoi thellë ndaj Fenerbahçes, 4-1, por shenjë në takim la arbitri kroat Ivan Bebek me gjykimin e tij. Tre kartona të kuq dha ai për turqit, përpos vendimeve tejet të dyshimta gjatë lojës. Portugezët bëjnë më tej, ndërsa Fenerbahçe i jep fund aventurës europiane, pasi fitorja 1-0 në 90 minutat e para në Stamboll nuk i bën punë.
Eshtë dorëzuar dhe Bajer Leverkuseni, që ndaj spanjollëve të Vilarealit nuk ka mundur të bëjë asgjë. 0-0 qenë shifrat e takimit të mbrëmshëm. Vilareali kualifikohet falë triumfit 2-0 një javë më herët.
Ballafaqimet çerekfinale do të mësohen sot në mesditë, kur edhe do të hidhet shorti. /tesheshi.com/
