Nga Mensur Krasniqi
Gëzim Ostreni, bashkëpunëtori më i afërt i Ali Ahmetit, ish-sekretari gjeneral dhe anëtar i BDI-së, sot para publikut zyrtarizoi paralajmërimin për hapjen e partisë së re të quajtur ‘Uniteti’. Në shoqëri të tij ishte deputeti tashmë i shkëputur nga rradhët e BDI-së, Zylfi Adili-Qufa, së bashku me Gazmend Selmanin, një nga themeluesit e Forumit Rinor të Bashkimit Demokratik për Integrim, Skënder Xhemailin, ish-kandidat për deputet, Mehmet Bajrami, ish-kandidat për këshilltar të BDI-së në Kumanovë.
Ostreni gjatë fjalimit të tij demantoi të gjitha thashethemet në opinion duke njoftuar se ‘Uniteti’ nuk është duplikat i BDI-së, e njëkohësisht duke akuzuar Ali Ahmetin si vasal të kryeministrit Nikolla Gruevski, ndërsa tha se partia e tij BDI ka harruar prioritetet e veta.
Përveç tjerash, Ostreni sqaroi se grupi tij ka bërë përgatitjet dhe ka nisur procedurën për krijimin dhe regjistrimin e kësaj partie.
“Idetë e partive tona janë të kontrolluara nga VMRO-DPMNE dhe mundohen të sigurojnë monopol për vete, shqiptarët po e ndjejnë veten të pasigurt për çështjet që i kanë votuar përfaqësuesit. Marrëveshja e Ohrit nuk po realizohet sepse janë betuar se do të jenë besnik ndaj organeve të shtetit. Ne vlerësojmë se partitë parlamentare shqiptare janë vasal të VMRO-DPMNE-së. Qeveria e Maqedonisë nuk ka nguruar të përdorë dhunë. Partitë i nxisin qytetarët për të fituar vota gjoja për t’u mbrojtur çështja shqiptare. Shtyllat e demokracisë janë deformuar, politikanët janë ngritur mbi kushtetutën. Duhet theksuar edhe kërcënimet që manifestohen me parulla fashiste kundër shqiptarëve, për këtë askush nuk përgjigjet. Uniteti do të kujdeset për rregullimin e kësaj gjendje, përmirësimin e shtetit, marrëdhënieve të mira, dhe jo t’i fyejmë dhunës, do ta forcojmë shtetin qytetarë multietnik. Shqiptarët si qytetarë duhet të jenë të barabartë dhe jo si lypsarë”, tha Gëzim Ostreni.
Ndryshe ka spekulime se partisë së re së shpejti pritet t’i bashkangjiten edhe disa deputetë tjerë të pakënaqur nga Bashkimi Demokratik për Integrim. /tesheshi.com/
