Amir-Saeid Iravani, ambasadori i Iranit në Kombet e Bashkuara, e bëri të qartë se pasurimi i uraniumit në Iran nuk do të ndalet kurrë, duke theksuar se kjo e drejtë është e garantuar nga Traktati i Mospërhapjes dhe se përdoret për qëllime paqësore të energjisë.
Iravani theksoi për CBS News se Irani dëshiron ta ruajë këtë të drejtë, por është gati për negociata – me kusht që të mos ketë dorëzim pa kushte.
Në të njëjtën kohë, Iravani hodhi poshtë pretendimet se vendi i tij po kërcënon Drejtorin e Përgjithshëm të Agjencisë Ndërkombëtare të Energjisë Atomike (IAEA), Rafael Grossi, si dhe inspektorët e agjencisë, të cilët aktualisht janë në Iran, por nuk kanë qasje në objektet bërthamore.
Edhe pse parlamenti iranian ka pezulluar bashkëpunimin me IAEA-n, ambasadori tha se inspektorët në Iran janë në kushte të sigurta, por nuk mund t’i kryejnë detyrat e tyre siç duhet sepse qasja e tyre është e kufizuar.
I pyetur pse Teherani refuzon disa propozime diplomatike, Iravani përsëriti se negociatat janë të mundshme vetëm nëse Shtetet e Bashkuara nuk vendosin kushte, të cilat ai i konsideron një diktaturë të politikës ndaj Iranit. Ai theksoi se, në rast të një marrëveshjeje, Irani do të shqyrtojë mundësinë e zhvendosjes së një pjese të uraniumit të pasuruar në një vend tjetër, por se nuk do të heqë dorë nga e drejta e tij për prodhimin vendas të uraniumit, një çështje kyçe që SHBA-të e refuzojnë.
Këto deklarata vijnë në një kohë të presionit të shtuar perëndimor mbi Iranin për të vazhduar negociatat mbi programin e tij bërthamor, vetëm disa ditë pas sulmeve të SHBA-së ndaj tre impianteve bërthamore, të cilat e përkeqësuan më tej situatën tashmë të tensionuar. /tesheshi.com/
