Serbia nuk do të pajtohet me hyrjen e Kosovës në Kombet e Bashkuara dhe as nuk do ta njohë atë në asnjë mënyrë dhe këtë ua kam thënë qartë të gjithë zyrtarëve perëndimorë, tha të enjten në mbrëmje presidenti serb Aleksandar Vuçiç.
Në një intervistë të gjerë për televizionin pro-qeveritar Happy, ai tha se “nuk i shkon mendja” të nënshkruajë kapitullimin e Serbisë “pa marrë parasysh sa i keq është plani evropian për Kosovën”.
“Nuk do të ketë asnjë kapitullim dhe dorëzim, këtë padyshim ua kam bërë të ditur të gjithë zyrtarëve perëndimorë dhe liderëve evropianë, ua kam thënë të gjithëve në fytyrë”, ka theksuar Vuçiç, duke numëruar zyrtarët me të cilët ka folur, që nga përfaqësuesit e SHBA-ve e deri te liderët e vendeve evropiane dhe BE-së.
Ai vlerësoi se ka “shumë diskutime dhe situata të vështira përpara” sa i përket Kosovës dhe pohoi se është “pothuajse i sigurt se Kurti nuk dëshiron të themelojë Unionin e Komunave Serbe, për të cilën Prishtina është përkushtuar në Marrëveshjen e Brukselit, arritur nën kujdesin e BE-së në prill 2013.
Vuçiç tha se këtë pretendim e mbështet në faktin se sot BE-ja u pajtua në parim për liberalizimin e vizave për Kosovën.
Momenti në Bruksel kur japin pëlqimin për liberalizimin e vizave për Kosovën, vjen në vend që t’i bëhet presion Kurtit që Prishtina t’i përmbushë obligimet e saj, që është parakusht për zbatimin e mëtutjeshëm të planit të BE-së për Kosovën, tha Vuçiç, duke vlerësuar se kjo është “inkurajim për Kurtin për të vazhduar politikën e tij”.
Vuçiç ka theksuar se asnjë anëtar i Këshillit të Sigurimit të OKB-së nuk do të pajtohet me pranimin e Kosovës në anëtarësim në Organizatën Botërore nëse Serbia nuk e pranon atë.
“Serbinë do ta ndjekin edhe Rusia edhe Kina sepse asnjë anëtar i Këshillit të Sigurimit të OKB-së nuk do të kundërshtonte nëse Serbia pajtohet me anëtarësimin e Kosovës në OKB, por Serbia jo dhe ata do ta ndjekin Serbinë”, tha Vuçiç.
Vuçiç tha se në dy vitet e ardhshme “problemet më të mëdha për Serbinë do të jenë politike, shpresoj jo ekonomike”, lidhur me luftën në Ukrainë dhe situatën me Kosovën.
“Sa i përket luftës së Ukrainës, Serbia ka respektuar të drejtën ndërkombëtare, Kartën e OKB-së, integritetin territorial dhe sovranitetin”, ka theksuar Vuçiç. /tesheshi.com/
