Rikthimi më 9 qershor në ring pas dy vitesh e gjysmë për boksierin britanik Tyson Fury pritet me interes, teksa ka përzgjedhur që të duelojë ndaj shqiptarit Sefer Seferi. Ky i fundit edhe pse nuk konsiderohet favorit, beson se do të arrijë ta ndalë ish-kampionin e botës në peshat e rënda, i pamposhtur në ring.
Seferi ka thënë se ka zemër luani, andaj beson në fitore ndaj Furyt.
“Unë do ta mund Fury, pasi kam një zemër prej luani. Unë jam një shqiptar dhe ne jemi lindur për të qenë luftëtar”, tha Seferi për mediat britanike, pak ditë para duelit me Fury.
“Ndoshta nuk do të jem në gjendje ta hedh në tapet, por e di se kam fuqinë për ta mundur me KO. Njerëzit mund të thonë çfarë të duan, por unë e kam vërtetuar edhe në të shkuarën forcën time”, ka deklaruar Seferi.
Ndërsa britaniku 29-vjeçar, e ka cilësuar 39-vjeçarin Seferi si të pashëm dhe të fortë, duke thënë se boksierët shqiptarë janë të mjaft të fuqishëm.
Kujtojmë se Fury nuk ka boksuar që nga nëntori i vitit 2015, kur e mposhti legjendën Wladimir Klitschko në Dusseldorf për të fituar titujt e IBF, WBA dhe WBO të peshave të rënda.
Meçi do të zhvillohet të shtunën më 9 qershor, në “Manchester Arena”, derisa dueli pritet të fillojë rreth orës 10 – 10:15 të mbrëmjes, me kohë lokale. /tesheshi.com/
