Presidenti Thaçi ka shfrytëzuar fjalën e tij në Këshillin e Sigurimit të OKB-së, thirrur nga Rusia dhe Serbia pas formimit të ushtrisë së Kosovës, për të denoncuar dhe njëherë faqes botës krimet serbe
“I pëlqeu dikujt apo jo, shteti i Serbisë ka vrarë 13 mijë civilë shqiptarë. Aparati i tyre shtetëror ka dhunuar rreth 20 mijë femra shqiptare. Për të vrarët asnjë i akuzuar e lëre më i dënuar”, ka thënë Thaçi, duke vijuar të jetë akoma dhe më konkret:
“Vetëm në fshatin Izbic, 160 të vrarë, të moshuar, gra fëmijë, në Krushë 250 civilë të vrarë, gra, pleq fëmijë – askush i akuzuar e askush i dënuar. Në fshatin Mejë gjithashtu, asnjë i akuzuar e as i dënuar. Vazhdojmë: Reçak, Rezallë e Abri…”, theksoi Thaçi. E sipas tij, shqiptarët e Kosovës vijojnë të jenë ende viktima në një tjetër formë.
“Pavarësisht se jemi viktima, sot në Kosovë më tepër ka të dënuar shqiptarë për krime lufte, sesa serbë. Ndërsa në Serbi asnjë serb nuk është dënuar për spastrim etnik dhe masakrat. Madje atje as nuk funksionon zyra për krimet e luftës”, shtoi presidenti i Kosovës.
Ndërkohë, homologu i tij serb u ankua duke thënë se serbët e kthyer në Kosovë janë 1.5 përqind, e se ai është i shqetësuar për fatin e tyre.
Vuçiç e paraqiti si të vështirë gjendjen në terren, pra sipas tij të serbëve të Kosovës, ndërsa Thaçi tha se situata është krejt normale, pa asnjë rrezik e tension. /tesheshi.com/
