Ndeshja e fundit e javës së 20 të kampionatit anglez do të luhet sonte në orën 21:00, e është pikërisht qershia mbi tortë e saj: Totenhem – Çelsi.
Me këtë derbi londinez merr fund dhe seria e gjatë e takimeve të Premier League-s gjatë ndërrimit të viteve, e nisur të premten e shkuar. Për t’i lënë vend një pushimi dhjetëditor, e për t’u kthyer në aktivitet më 14 janar.
Sfida e mbrëmjes së sotshme vjen në një moment mjaft të mirë për të dy ekipet. Pritësit në “White Hart Lane” i kanë fituar katër takimet e tyre të fundit në kampionat. Fitorja do të ishte fantastike për Totenhemin, pasi veç lënies së vendit të pestë dhe ngjitjes më lart në klasifikim, do të bëhej dhe ekipi që do të ndalte më në fund vrullin e Çelsit. Barazimi, po ashtu, mund të çmohej si një rezultat pozitiv.
Përndryshe, Çelsi kërkon fitoren e katërmbëdhjetë, një rekord më vete ky. Çelsi ka marrë përpara çfarë ka gjetur që nga 1 tetori i 2016-s, vetëm një javë pasi pësoi humbjen e fundit në kampionat, atë ndaj Arsenalit.
Një fitore do të sillte shkëputjen akoma më tepër nga Liverpuli, ndjekësi më i afërt i Çelsit në renditje. Nga pesë pikë, diferenca mes vendit të parë dhe të dytë do të shkonte në tetë pikë.
Mes ndeshjeve të tjera të dy ditëve të shkuara, veçohet barazimi 2-2 i Sandërlendit me Liverpulin, si dhe barazimi spektakolar 3-3 i së martës mes Bornmëthit dhe Arsenalit. /tesheshi.com/
