Zero me zero, tani loja nis nga fillimi. Milanoja po bën një përpjekje të re për të hartuar itinerarin e punës që do të sjellë ndërtimin e një xhamie, në kryeqendrën e rajonit që është tashmë shtëpi e komunitetit më të madh islam në Itali. Kryebashkiaku i Milanos, Beppe Sala, njofton se “realisht pas disa vjetësh, madje edhe në tokë private”, mund të ngrihet xhamia e parë milaneze. Njoftimi vjen nga anekset e takimit të jashtëzakonshëm të këshillit komunal mbledhur për të diskutuar pikërisht mënyrat sesi duhet të garantohet për të gjithë besimtarët në Milano e drejta e ushtrimit të fesë.
Gjithsesi, optimizmi i kryebashkiakut përballet me ligjin rajonal të vitit 2015 që shkon kundër ndërtimit të xhamive e vendeve të kultit, e që është ende në fuqi, edhe pse pjesërisht u kundërshtua nga Gjykata Kushtetuese, e më pas u “ripërshtat” nga rajoni i Lombardisë. Sipas këtij ligji, komuna ka të tashmë detyrën të përpilojë integrimin e planit qeveritar mbi territorin në një dokument të vetëm të quajtur Plani i Mjediseve Fetare, që vendos për secilën zonë të seleksionuar kërkesat e nevojshme për ngritjen e vendeve të kultit. Një dokument që normalisht do të kërkonte më shumë se një vit punë, por që sipas disave nëse ekziston vullneti mund të përmbushet edhe në më pak kohë.
Përpjekja për të vendosur dy zona të bashkisë në dispozicion të komunitetit islam, ishte stopuar për shkak të ligjit “kundër-xhamive”, e që parashikonte ndërtimin e vendeve të kultit në zona publike. Por zyrtarë komunalë thonë se tashmë për ndërtimin e xhamisë mund të përdoren edhe terrene private: “Duam të identifikojmë zonat dhe më pas të përparojmë duke gjetur njerëzit që janë në gjendje të investojnë duke dhënë garanci se nga vijnë fondet që do të përdoren”, specifikojnë zyrtarët.
Çështja e parave duket e rëndësishme, në mënyrë të veçantë, duke marrë në konsideratë se disa shoqata që kishin marrë pjesë në konkursin e vitit 2015 nuk kishin qenë në gjendje të tregonin në mënyrë korrekte origjinën e fondeve, ndërsa të tjera u akuzuan për marrëdhënie me Vëllazërinë Muslimane.
Edhe kundërshtitë për ndërtimin e xhamisë fokusohen pikërisht në këtë pikë: “Deri sa të mos kemi një ligj kombëtar që garanton gjurmimin e financimeve, nuk mund të lejojmë të japim “ok” për ndërtimin e xhamive të tjera”, thotë Stefano Parisi, lideri i qendrës së djathtë milaneze, duke nënvizuar ekzistencën e problemit të sigurisë. “Rreziku për Milanon nuk është një xhami me vonesë, por terrorizmi, një nga problemet më të mëdha në Europë”.
Por ndërkohë ata që vuajnë pasojat e ligjit “kundër-xhamive” janë të gjitha besimet, duke nisur nga komuniteti evangjelik, që pikërisht për këtë arsye, preferon që ligjin ta cilësojë “kundër-kulteve”. “Nëse është e vërtetë që në muajt e fundit në Milano janë dhënë katër urdhëra mbylljeje për qendrat islame, është e vërtetë po ashtu se nga viti 2013 janë mbyllur 26 nga rreth 500 kishat evangjelike në territorin lombard, me një përshpejtim pas miratimit të ligjit”, bëjnë të ditur zyrtarë të kishës evangjelike.
Motivet për raste të tilla: mungon destinacioni i përdorimit, dokumenti që përcakton se bëhet fjalë për një godinë kulti, dhe se cilat janë kriteret që duhen respektuar.
Përgatiti: Juli Prifti – /tesheshi.com/
