Bashkimi Europian përballet prej kohësh me një sërë sfidash që kanë vënë në pikëpyetje vetë ekzistencën e tij. Problemet ekonomike, kriza e refugjatëve, dilemat e zgjerimit, largimi i pritur i Britanisë, hovi i partive të ekstremit të djathtë, janë mes dukurive që e kanë sjellë në vëmendje shpërbërjen e unionit.
Një prej atyre politikanëve që e pranon se shpërbërja e BE-së mund të ngjasë është zëvendëskancelari i Gjermanisë, Sigmar Gabriel.
Ai i ka deklaruar Der Spiegel-it se shpërbërja e Bashkimit Europian nuk është më e pamendueshme. Masat shtrënguese ekonomike për të cilat ka këmbëngulur Gjermania, mendon ai, e kanë përçarë Europën më shumë se kurrë.
Sigmar Gabriel e ka vënë theksin te rreziqet politike që kanë sjellë përpjekjet e ethshme të vendeve si Franca dhe Italia për ta zvogëluar deficitin e tyre fiskal.
“E pyeta njëherë kancelaren se ç’do të qe më me kosto për Gjermaninë, që Franca të lejohej të kishte një gjysmë përqindje më tepër deficit, apo që Marine Le Pen të bëhej presidente?” i ka rrëfyer revistës zëvendëskancelari.
“Deri më sot nuk kam marrë përgjigje,” ka plotësuar logjikën Gabriel, duke vënë në pah pështjellimin ekzistues.
Ai pritet të rivalizojë me Merkel-in për postin e kancelarit në shtator, në zgjedhjet federale, ndërsa partia e tij, SPD-ja, është partnere me konservatorët e Merkel-it në koalicionin qeverisës. /tesheshi.com/
