Një prej lojtarëve më në formë tek Reali i Madridit, Marko Asensio e ka humbur për “një fije” ndeshjen hapëse të Champions Leagues, kundër Apoel.
Kur lajmi u bë i ditur pas publikimit të formacioneve, e kur mungesa edhe në stol e 20-vjecarit ra në sy, të gjithë përgatitën të pyesin trajnerin Zidane për shkaqet.
E Zizu-ja, duke mos patur asnjë justifikim “të hajrit” përveç të vërtetës, nuk e fshehu dot atë dhe ua tregoi mediave.
Shkaku i mungesës së Asensions është se gjatë depilimit që u ka bërë këmbëve, diçka i ka dhënë infeksion në lëkurë duke e detyruar të vrapojë me vështirësi dhe jo pa dhimbje.
Ka qenë vetë futbollisti që ka kërkuar të shihej e gjendej problemi, i cili me sa u konstatua, kish ndodhur për shkak të pastrimit të këmbëve nga qimet. Mund të jesh në kulmin e formës, mund të jesh dëshira e shumicës së klubeve më të njohur të botës e mund të shihesh si e ardhmja e futbollit botëror, por duhet të kesh kujdes, sepse ndonjëherë, “digjesh për një qime”. /tesheshi.com/
