Kryebashkiaku i së djathtës ekstreme franceze, Robert Menard u gjobit me 2 mijë euro nga gjykata për nxitje të urrejtjes, pasi kishte deklaruar se kishte “tepër fëmijë muslimanë” në shkollat lokale.
Kryebashkiaku i qytetit jugor, Beziers është aleat i partisë Fronti Nacional, e njohur për idetë e veta kundër emigrantëve. Më 1 shtator 2016, në ditën e parë të shkollës në Francë, ai shkroi në rrjetet sociale se po dëshmohet “zëvendësimi i madh”, duke iu referuar akuzës për fshirje të popullsisë së bardhë të krishterë të Francës nga emigrantët.
Më 5 shtator, i ftuar në një studio televizive, Menard tha: “Në një klasë në shkollën në qendër të qytetit tim, 91 për qind e fëmijëve janë muslimanë. Dukshëm, ky është një problem. Ka limite edhe për tolerancën”.
Ligji francez i ndalon statistikat bazuar mbi bindjen fetare apo etninë e njerëzve. Menard i mbrojti komentet e tij duke thënë se thjesht kishte përshkruar situatën në qytetin e tij. “Nuk ishte një gjykim, është një fakt”.
Përveç gjobës, gjykata caktoi edhe 1 mijë euro në favor të grupeve anti-raciste që kishin sjellë çështjen para trupit gjykues. Menard tha se do të apelojë kundër vendimit. /tesheshi.com/
