Ndërsa në Bruksel ulën dhe bisedojnë për normalizim marrëdhëniesh, krerët e Serbisë dhe Kosovës nga distanca gjuhen me deklarata nga më të ndryshmet. Kjo ka ngjarë së fundmi mes presidentit serb Aleksandar Vuçiç dhe kryenegociatorit kosovar Avni Arifi.
E gjitha nisi pasi Vuçiç deklaroi të shtunën se për vendin që ai drejton do të ishte fitore në qoftë se e merr një metër në Kosovës, ku sot nuk kanë asgjë.
“Nga e gjitha që ata e humbën, nëse veç një metër e marrim, është fitore, sepse tani nuk kemi asgjë. Njerëzit duhet të kenë besim në udhëheqjen e tyre që punojnë gjatë tërë kohës në këtë çështje”, ka deklaruar Vuçiç, ndërsa ka akuzuar ish-qeverinë se më 2012 kanë vënë kufirin në Jarinje dhe vendosën “vulën dhe dyllin mbi pavarësinë e Kosovës”.
I menjëhershëm ishte reagimi i Arifit, i cili tha se territori i Kosovës s’mund të cenohet nga askush
“Asnjë metër të tokës së Kosovës për asnjë çmim!!!! E urryeshme është ngrirja e konfliktit, e urryeshme është pasiguria dhe gjendja ekzistuese por asnjëra nuk e meriton dhe nuk e merrë kurrë as një metër të Kosovës. Sovraniteti dhe territori i Kosovës nuk cenohet nga askush për asnjë çmim. As tash as kurrë”, ka thënë Arifi.
Kujtojmë se për riformulimin e kufijve me Serbinë ditë më parë foli presidenti Thaçi kur u pyet nga gazetarët, me ç’rast konfirmoi se çështja e kufijve do të jetë në tavolinë nëBruksel, por siguroi se ai nuk do të lejoj që kufijtë e Kosovës të cenohen.
“Janë diku 400 kilometra që vënë vijën kufitare mes dy vendeve. Vazhdimi i kësaj situate është në dëm të dy vendeve. Unë nuk jam i interesua për kufijtë të ri me Serbinë jam i interesuar për paqe sepse nëse ndodhin kufij të rijnë do të ketë konflikt të ri dhe shkatërrim. E ritheksova që çështja e kufirit Kosovë – Serbi do të jetë në tavolinë dhe ne duhet ta mbyllim këtë proces si duhet sepse askush nuk është i interesuar ta dëmtoj sovranitetin e Kosovës. Kosova e Serbia kufijtë shtetëror nuk kanë pasur kurrë dhe kemi ekspertët që do t’i japin mendimet e tyre dhe unë do të ftoj edhe përfaqësuesit e NATO-s për këtë sepse kam besim të plotë ne mendimin e tyre sepse ne vështire e kemi me u marr vesh për kufijtë me Serbinë”, tha Thaçi. /tesheshi.com/
