Deputeti socialist, Erjon Braçe ka vendosur që të ngrejë padi penale ndaj kolegut të tij të kahjes tjetër politike, Flamur Noka. Akuza, siç njoftoi Braçe do jetë “dhunë për shkak të detyrës”.
Ky akt i deputetit të majtë vjen pas incidentit mes tyre gjatë paradites, ku Noka e goditi, në fakt vetëm me një copë letër, pa e cenuar, gjithsesi, fizikisht.
Por për Braçen, sjellja e deputetit të opozitës është një strategji e qartë dhune nga një parti që e ka instaluar dhunën për 26 vite me radhë.
“Kjo që ndodhi në Kuvend nuk është asgjë në krahasim me atë që bënë më 21 janar, kur Sali Berisha pushkatoi në mes të bulevardit qytetarët vetëm pse mendonin ndryshe nga ai. Pas 20 vitesh vjen një moment dhe thua boll për gjithë llumin e tyre. Kjo histori dhune për shkak të mendimit ndryshe, duhet të marrë fund. Në këtë vend nuk ka sistem drejtësie, sepse nëse ka nuk mund të bëjë këto që bën ky soj kriminelësh. Noka nuk e ka për herë të parë. Ai ka goditur disa deputetë. Por këtë rradhë që nesër do të përballet me padinë penale për dhunë për shkak të detyrës”, u shpreh Braçe. Dhe në ndodhtë që Braçe ta fitojë gjyqin, Noka penalizohet më pas nga ligji i dekriminalizimit. /tesheshi.com/
