Prokuroria e Krimeve të Rënda ka kërkuar katër vite e gjysmë burg për ish-kryetarin e Bashkisë së Peshkopisë, i akuzuar për korrupsion pasiv.
Gjykimi për ish-kryebashkiakun është i shkurtuar, gjë që nënkupton se ai do të përfitojë zbritjen e një të tretës së dënimit nëse shpallet fajtor nga gjykata. Shtoji kësaj dhe vendimin përfundimtar, veç llogaritjes së kohës së paraburgimit e një zbritjeje dënimi në apel, dhe Shukri Xhelili mund ta shohë shpejt veten jashtë hekurave të burgut.
I quajturi shkurt Shuke e mori tatëpjetën pas përgjimeve filmike të transmetuara pranverën e këtij viti, kur ai u shfaq në televizion teksa i kërkonte favore seksuale një vajze të re dibrane në shkëmbim të një vendi pune.
Fama e Shukes mori dhenë për shkak të banalitetit të gjuhës së tij, të mësuar nga përgjimet, si dhe për paraqitjen e turpshme me të mbathura, transmetuar pandërprerë në kanalet televizive. /tesheshi.com/
