Për herë të parë, Komisioni Qendror i Zgjedhjeve lajmëron se në kuadër të zgjedhjeve të 21 qershorit është në përfundim procesi i prodhimit të shabllonëve për zgjedhësit të cilët nuk shikojnë.
KQZ e cilëson këtë angazhim si një detyrim moral, përtej atij ligjor.
“Në çdo Qendër Votimi, për të dy fletët e votimit, do të jenë të disponueshme shabllonët përkatës. KQZ për të bërë realitet mesazhin që përcolli për këtë kategori, “të kesh aftësi të kufizuar fizike, nuk do të thotë të ndihesh i kufizuar për të ushtruar të drejtën e votës”, në bashkëpunim të ngushtë dhe me organizatat përfaqësuese ka vendosur prodhimin e dy fletë votimi me përmbajtje të ndryshme për secilën nga 61 bashkitë”,- bëri me dije sot Drilona Hoxha, zëdhënëse e KQZ-së..
Ajo informoi se modelet e shablloneve i janë shpërndarë organizatave përfaqësuese, për të bërë të mundur që këta zgjedhës të njihen paraprakisht me to dhe ditën e votimit t’i përdorin me lehtësi.
Komisioni Qendror i Zgjedhjeve, është investuar në mënyrë të vazhdueshme për zgjedhësit me aftësi të kufizuar, për t’i krijuar brenda mundësive, secilës kategori, kushte optimale përshtatshmërie në Qendrat e Votimit ku ata janë të regjistruar.
Gjithashtu, Kodi Zgjedhor nuk e ngarkon KQZ me përgjegjësinë e krijimit të përshtatshmërisë dhe e ndërtimit të rampave në çdo objekt ku janë të vendosura qendrat e votimit, por KQZ me ndihmën e partnerëve ndërkombëtar, ka arritur të ndërtojë rampa të përhershme në disa qytete të vendit dhe brenda mundësive të tij në disa objekte ku ka shumë QV, ditën e zgjedhjeve do të vendosë rampa druri.
KQZ i ka kërkuar kryetarëve të njësive të qeverisjes vendore, vendosjen e Qendrave të Votimit ku ka të regjistruar zgjedhës me aftësi të kufizuara, në katet e para të objekteve.
Sipas Komisionit Qendror të Zgjedhjeve, elementë të cilët dëshmojnë përkushtimin e KQZ-së për të krijuar lehtësitë e nevojshme që zgjedhësit me aftësi të kufizuar të ushtrojnë të drejtën e tyre për të votuar në mënyrë vetjake dhe pa pengesa janë:
1- Punësimi i 12 personave me aftësi të kufizuar si Inspektorë Rajonalë Zgjedhorë, për të ndjekur nga afër problematikat e kësaj kategorie zgjedhësish në procesin e votimit.
2- Përshtatja e të gjithë spoteve, sensibizliues dhe informues në gjuhën e shenjave;
3- Punësimi pranë administratës së KQZ-së i dy personave me aftësi të kufizuar’
4- Prodhimi i spotit televiziv dhe posterit specifik për personat me aftësi të kufizuar.
