Një shumicë parlamentare prej 261 deputetësh kanë dhënë votën e tyre sot në parlamentin grek për të zgjedhur presidentin e ri të vendit.
Votat kanë shkuar për një grua, e para presidente në historinë e vendit.
Katerina Sakellaropoulou ka patur mbështetjen e tre partive të mëdha. Ajo do ta bëjë betimin në mesin e muajit të ardhshëm, kur dhe mbaron mandati i presidentit aktual grek.
63-vjeçarja, e bija e një anëtari të Gjykatës së Lartë të Greqisë, i ka kryer studimet pasuniversitare në Universitetin e Sorbonës.
Ajo ka mbajtur deri tani postin e kreut të Gjykatës Administrative, Këshillit të Shtetit, si e para grua dhe në atë detyrë.
Posti i presidentit është më së shumti ceremonial në Greqi. /tesheshi.com/
