Është nënshkruar sot për herë të parë në Shqipëri një marrëveshje mes Shërbimit Kombëtar të Punësimit dhe Shërbimit të Provës për realizimin e formimit profesional dhe përfshirjen në skemat e punësimit për të dënuarit me dënime alternative.
Kjo marrëveshje ka për qëllim reintegrimin në shoqëri të dënuarve me dënime alternative dhe parandalimin e përsëritjes së veprave penale.
Drejtori i SHKP, Genci Kojdheli, vlerësoi se kjo marrëveshje specifikon të gjithë nivelin e bashkëpunimit midis dy institucioneve. Nga ana e tij, drejtori i Shërbimit të Provës, Ilir Qafa, u shpreh se kjo nismë është më e gjerë dhe vetëm përmes reintegrimit të plotë, recidivizmi mund jenë në përmasat e synuara.
Shërbimi Kombëtar i Punësimit përmes kësaj marrëveshjeje merr përsipër të realizojë formimin profesional dhe punësimin e të dënuarve me dënime alternative, të referuar nga Shërbimi i Provës dhe do të vlerësohet mundësia e përfshirjes së të dënuarve me dënime alternative në skemat e nxitjes së punësimit.
Përmes kësaj marrëveshje, Drejtoria e Përgjithshme e Shërbimit të Provës merr përsipër të orientojë të gjithë të dënuar me dënime alternative mbi kurset e formimit profesional të ofruara nga Drejtoritë Rajonale të Formimit Profesional Publik për punëkërkuesit e papunë, të regjistruar nga zyrat e punës, si dhe mbi mundësinë e përfshirjes në skemat e nxitjes së punësim me qëllim reintegrimin e tyre në shoqëri dhe pjesëmarrjen në tregun e punës.
Grupi i synuar për zbatimin e kësaj marrëveshje janë të rinjtë në moshë pune, personat mbi 45 vjeç, kryefamiljarët, nënat me shumë fëmijë etj,.
Fillimisht kjo marrëveshje do të zbatohet dhe pilotohet për zonat që paraqiten me prioritet nga Shërbimi i Provës si Tiranë, Korçë, Durrës, Shkodër dhe kudo tjetër që Shërbimi i Provës paraqet të domosdoshme asistencën për formimin profesional dhe punësim.
Kjo është hera e parë e nënshkrimit të një marrëveshjeje të tillë mes dy institucioneve shtetërore. Shërbimi i Provës ka bashkëpunime me OJQ për reintegrimin e personave me dënime alternative, por me këtë marrëveshje synohet përfshirja në nxitje e të dënuarve./tesheshi.com/
