Të mërkurën në Beograd u shënua, për herë të parë, 15-vjetori i Pavarësisë së Kosovës, organizuar nga Zyra Ndërlidhëse e Prishtinës në kryeqytetin serb.
“Me ftesë të ambasadorit Jetish Jashari, për herë të parë në Beograd u festua përvjetori i Pavarësisë së Republikës së Kosovës, në 15 vjetorin e saj”, ka shkruar Ragmi Mustafa, ish-kryetar i Këshillit Kombëtar të Shqiptarëve në Serbi.
Mustafa bëri të ditur se në festën e pavarësisë së Kosovës, përveç përfaqësuesve institucionalë dhe politikë të shqiptarëve të Luginës së Preshevës, kanë marrë pjesë edhe përfaqësues të shoqërisë civile në Beograd, si dhe përfaqësues të misioneve diplomatike ndërkombëtare.
“Një emocion i veçantë. Gëzuar Kosovë”, ka shkruar Mustafa.
Në festën e Pavarësisë së Kosovës ka marrë pjesë edhe përfaqësuesi i vetëm shqiptar në Kuvendin e Serbisë, Shaip Kamberi, i cili ka shpërndarë edhe foto nga ngjarja në Facebook.
Kosova shpalli pavarësinë nga Serbia më 17 shkurt 2008, por Serbia nuk e njohu dhe nuk e njeh Kosovën. Dialogu për normalizimin e marrëdhënieve ndërmjet Kosovës dhe Serbisë mbahet në Bruksel që nga viti 2011.
Bazuar në marrëveshjen e nënshkruar në Bruksel, Prishtina dhe Beogradi shkëmbyen oficerët e tyre të parë ndërlidhës në qershor 2013. /tesheshi.com/
