Për çfarë rezultate dhe vendime të mëdha po flet Isa Mustafa?

Nga Blendi Gashi

Ndonëse qeveria aktuale konsiderohet më e dobëta që nga paslufta nga analist politik por edhe opozitarë, kjo aspak nuk e pengon kryeministrin Mustafa që të thurr në vazhdimësi lavde të panumërta për ekzekutivit që drejton.

Këtë gjë ai e ka bërë edhe sot përmes një postimi në Facebook derisa nuk ka lënë rastin pa goditur fort opozitën që e quan të dhunshme.

Mustafa ka folur për sfidat dhe rezultatet që ka treguar qeveria e tij, duke thënë se “koalicioni qeverisës ka arritur shumë në kushte jo të zakonshme”.

“E mundëm dhunën dhe përpjekjet për instalimin të rrënimit të pushtetit demokratik me dhunë, të paparë jo vetëm në Ballkan por edhe në demokracitë tjera. Është kjo Qeveri e vendimeve të mëdha dhe e reformave të mëdha. Reformat zakonisht nuk janë populliste. Ato japin rezultate më vonë. Ne nuk do të dorëzohemi para reformave dhe vendimeve të mëdha, sado të vështira të jenë ato. Ndërmjet interesave afatshkurtra që ndërlidhen me votat dhe interesave të shtetit unë do të zgjedh këtë të dytën”, ka deklaruar Mustafa.

Nga ky positm i kryeminsitrit vërehet se i mungojnë rezultatet e mëdha, pasi nuk mund të rendit asnjë të vetme.

Rezultate të mëdha siç mund ta dij ai do ishin themelimi i ushtrisë, heqja e vizave për kosovarët dhe ulja e papunësisë e varfërisë. Asnjë prej këtyre nuk ka ndodhur. Po të realizoheshin sigurisht do i rendite në rend të parë si vendime të mëdha, për çka askush nuk do mund t’ia mohonte, as kundërshtarët politik.

Vendime të mëdha shihen edhe Demarkacioni e Asociacioni por as këto deri më tani nuk i ka përmbushur.

Kurse, sa i përket dhunës që përmend është mëse e vërtetë se ajo ka ndodhur brenda institucioneve, konkretisht në Kuvend, por për këtë fajtor nuk është veç opozita, pasi pushteti ka nënshkruar marrëveshjen për demarkimin e kufirit me Malin e Zi pa u konsultuar fare me opozitën, shoqërinë civile dhe pa marrë mendimin edhe të ekspertëve të pavarur, duke qenë i mbyllur në tërësi dhe i besuar vervërisht vetëm komisionit shtetëror.

Ndërsa nuk mund të thuhet me saktësi të plotë se përmes dhunës është tentuar të rrënohet pushteti. Edhe pse opozitarët në protesta kanë kërkuar largimin e qeverisë, në vazhdimësi kanë potencuar gjatë protestave se pushtetin nuk e duan përmes dhunës, dhe se duan vetëm që marrëveshja për Demarkacionin të kthehet në pikën zero dhe të mos themelohet “Zajednica” si pushtet i tretë në vend.

Mustafa, edhe pse thotë se para interesave afatshkurta zgjedh interesat e vendit, ai siç duket ka harruar pasi për interesa krejtësisht personale, tradhëtoi koalicionin opozitar të ashtuquajtur VLAN vetëm e vetëm që të reahtohet në karrigen e kryeminsitrit, pikërisht në kohën kur mendohej se po vinte një erë ndryshimi në qeverisje.

Kushtet mund të kenë qenë vërtetë të pazakonshme kur drejtimin e vendit e mori koalicioni i ashtuquajtur i “elefantëve”, i cili u përball që në start me probleme të mëdha si ikja ilegale e qytetarëve nga vendi, më pastaj protestat e vazhdueshme të pozitës, por këto ndodhën pikërisht pasi Mustafa mori vendim që të lidh koalicion me PDK-në, të cilët e akuzonte se përmes SHIK-ut po e shantazhon partinë e tij. /tesheshi.com/