Bashkimi Evropian mund t’i vazhdojë mandatin misionit të saj për sundim të ligjit, në Kosovë, EULEX edhe pas qershorit të vitit 2016, kur ishte paraparë që ky mision të përfundojë mandatin e saj.
Pro qëndrimit të këtij misioni në shtetin tonë është edhe kryeministri aktual Isa Mustafa.
Ai sot ka deklaruar se EULEX-i duhet të vazhdojë të veprojë në disa fusha, mirëpo siç ka thënë gjithnjë duke i lëshuar hapësirë për veprim, organeve vendore.
Kreu i ekzekutivit kosovar ka bërë të ditur se ende është duke u biseduar me Brukselin për vazhdimin e mandatit të EULEX-it.
“Sa i përket EULEX-it tani jemi duke biseduar akoma. Ne kemi arritur mjaft përparime gjatë vizitës që ishte nga Brukseli javën e kaluar këtu. Kanë mbetur edhe disa çështje të hapura, për të cilat unë nuk preferoj tani të flasim, sepse megjithatë duhet t’i diskutojmë me Brukselin. Por orientimi është që EULEX-i duhet të vazhdojë në disa fusha edhe më tutje. Mirëpo gjithmonë duke lëshu hapësirë që organet vendore, të marrin sa më shumë hapësirë në këto fusha dhe përgjegjësia të kapërcej me kohë në organet vendore”, tha Mustafa.
Por, shtrohet pyetja pse kjo dëshirë e madhe e kryeministrit Mustafa që EULEX-i të vazhdojë qëndrimin në Kosovë?
Padyshim se një prej arsyeve pse Mustafa kërkon që EULEX të mbetet në Kosovë mund të lidhet me aksionin e fundit të EULEX-it ku u arrestua deputeti i PDK-së Azem Syla. Sigurisht Mustafa shpreson se ky mision ndërkombëtarë do të arrestoj edhe ndonjë “peshq të madh” sigurisht zyrtarë të PDK-së dhe kështu si kryeministër i vendit të mundohet të përfitoj poena politik me arsyen se nën qeverisjen e tij po sundon rendi dhe ligji dhe të gjithë abuzuesit e ligjit do të ballfaqohen me të.
Ndryshe, ekspert të sigurisë dhe analist të vendit por edhe vet drejtues të partive disa herë janë deklaruar se EULEX-i ka dështuar të bëj punën për çfarë është thirrur, andaj qëndrimi i këtij misioni ndërkombëtarë në Kosovë shihet vetëm për të kënaqur apetitet e ndërkombëtarëve, por jo pse vërtet mund të jap rezultate të mëdha në sundim të rendit dhe ligjit.
Ndryshe, EULEX-i ka rreth 1400 të punësuar ndërkombëtarë dhe vendas. Kurse, buxheti vjetor i këtij misioni ndërkombëtarë është rreth 76 milionë euro.
Përgatiti: Blendi Gashi -/ tesheshi.com/
