Kreu i PD-së, Lulzim Basha ka dhënë një tjetër deklaratë në lidhje me zgjedhjet në Dibër, ku siç tha ai, opozita do angazhohet në shkëputjen e lidhjeve të politikës me krimin. Sipas tij, nuk ka asnjë diskutim se vota në Dibër është blerë me para droge.
“Konkluzioni i grupit në raport me atë që duhet të bëjmë nesër, është ajo që e dinë të gjithë qytetarët, se aleanca e politikës me krimin dhe në veçanti bashkëpunimi i kartelit të drogës me Edi Ramën shkatërruan procesin politik në zgjedhjet e Dibrës. Ky është një problem jetik për të gjithë Shqipërinë dhe jo vetëm PD-në dhe opozitën. Grupi tregoi vendosmëri të plotë dhe të gjithanshëm, siç unë e kam shpallur. Vendosmërinë e PD-së për të këputur hallkën lidhëse të krimit me politikën, që e ka futur Shqipërinë në një situatë të paprecedentë. Hapat e mëtejshëm që do të diskutojmë, aksioni politik me qytetarët dhe aleatët tanë që do të ndërmarrim, do të na mundësojë që ne t’ia dalim të këpusim këto hallka dhe të rikthejmë lirinë dhe të drejtën e votës”, tha Basha.
Deklarata e kreut democrat erdhi pas një mbledhjeje të grupit parlamentar të PD-së, ku siç mësohet, ka patur reagime ndaj tij prej një grupi deputetësh. Ka qenë pikërisht dyshja Selami – Bregu që i janë kundërvënë Bashës pas humbjes së radhës në Dibër. /tesheshi.com/
