Turqia shpreh një angazhim të vendosur për të marrë pjesë në përpjekjet e koalicionit kundër Shtetit Islamik, deklaroi Pentagoni, ndërsa dy vendet janë duke finalizuar detajet teknike për përfshirjen e plotë të Turqisë në operacione. Zëdhënësi i Petangonit, majori James Brindle sqaroi gjithashtu se deri sa këto detaje të finalizohen, SHBA ka kërkuar nga Turqia të mos ndërmarrë sulme të pavarura ndaj Shtetit Islamik, në mënyrë që të mundësojë sigurinë për sulmet e koalicionit në hapësirën ajrore.
Turqia ka rënë dakord të ndërpresë sulmet e saj dhe shumë shpejt do të nisë të marrë pjesë në sulmet e koordinuara të koalicionit kundër Shtetit Islamik.
Muajin e kaluar, Turqia ra dakord të lejojë forcat e koalicionit që drejtohet nga SHBA të zhvillojnë sulmet e tyre ajrore duke u nisur nga baza ajroe turke, Incirlik, që ndodhet në afërsi të kufirit me Sirinë.
SHBA nisën misionet nga baza strategjike turke fundjavën e kaluar, prej nga u realizua edhe sulmi i parë me dronë.
Gjatë fundjavës, në bazë janë vendosur një kontigjent prej gjashtë avionësh F-16s dhe një personel prej 300 trupash. Nuk ka të dhëna për shtesë trupash në ditët që vijnë. /tesheshi.com/
