Pentagoni shprehu skepticizëm në lidhje me njoftimin e presidentit rus Vladimir Putin, se ai kishte urdhëruar tërheqjen e pjesshme të trupave nga Siria.
Putin vizitoi të hënën vendin e shkatërruar nga lufta dhe tha se një “pjesë e rëndësishme” e kontigjentit të trupave ruse në Siri po shkon në shtëpi pasi misioni i tyre kishte përfunduar në masë të madhe.
Por zëdhënësi i Pentagonit, Major Adrian Rankine-Galloway tha se deklarata të tilla nuk mbështeten domosdoshmërisht edhe me veprim.
“Komentet ruse për largimin e forcave të tyre shpesh nuk korrespondojnë me reduktimet aktuale të trupave dhe nuk prekin prioritetet e Shteteve të Bashkuara në Siri”, tha ai.
Një zyrtar amerikan i tha AFP se Putin ka gjasa të kryejë një “tërheqje” të disa avionëve, pastaj do vazhdojë të kërkojë që edhe Shtetet e Bashkuara të tërheqin forcat e saj jashtë Sirisë.
Ushtria amerikane javën e kaluar tha se do të qëndrojë në Siri, ku po lufton ISIS-in, për aq kohë sa është e nevojshme për të siguruar që këta të fundit të mos kthehen më. /tesheshi.com/
