Rusia, e cila ka njoftuar se po zgjeron ofensivën e saj në Ukrainë, duket “gjithnjë e më shumë e pakënaqur” për shkak të rezistencës së fortë të ushtrisë ukrainase, tha Pentagoni, i cili po përgatitet të dërgojë armë shtesë në ushtrinë ukrainase, transmeton AFP.
“Ne vlerësojmë se më shumë se 50 për qind e forcave të përgatitura nga (Presidenti rus Vladimir) Putin kundër Ukrainës (…) janë operacionale” në atë vend”, tha të shtunën një zyrtar i lartë i Departamentit të Mbrojtjes të SHBA-së, duke folur në kushte anonimiteti.
Ai e bëri deklaratën pak minuta para njoftimit të Ministrisë së Mbrojtjes ruse, sipas së cilës “të gjitha njësitë morën urdhër për të zgjeruar ofensivën në të gjitha drejtimet”.
Të paktën 198 civilë, përfshirë dy fëmijë, janë vrarë dhe 1,115 janë plagosur që nga e enjtja, tha ministri ukrainas i Shëndetësisë Viktor Liachko.
“Shenjat e rezistencës këmbëngulëse të Ukrainës”
Presidenti ukrainas Volodymyr Zelensky shprehu kënaqësinë për rezistencën e ofruar nga vendi i tij: “Okupatorët donin të pushtonin zemrën e vendit tonë dhe të vendosnin kukullat e tyre, si në Donetsk. Ne e prishëm planin e tyre,” tha ai të shtunën, duke vënë në dukje se ushtria ruse “nuk kishte bërë asnjë përparim”.
Pentagoni vlerëson se që kur Rusia nisi ofensivën e saj ushtarake të enjten, forcat e saj në veri, lindje dhe jug të Ukrainës – më shumë se 150,000 trupa të pajisur me tanke, bombardues dhe raketa – nuk kanë përparuar aq shpejt sa priste Moska.
“Ne ende shohim shenja të rezistencës këmbëngulëse ukrainase,” tha një zyrtar i lartë amerikan. “Ne mendojmë se rusët janë gjithnjë e më të pakënaqur me humbjen e momentit në 24 orët e fundit, veçanërisht në Ukrainën veriore.”
Rezistenca është më e ashpër në veri të Kievit dhe në afërsi të Kharkovit, në lindje të vendit, sipas Pentagonit.
Rezistencë më e fortë se sa prisnin rusët
Të shtunën, forcat ruse nuk kishin kapur ende asnjë qytet ukrainas dhe nuk kishin marrë kontrollin e hapësirës ajrore të Ukrainës, shtoi zyrtari.
“Mbrojtja ajrore e Ukrainës, si dhe avionët e saj, janë ende operacionale, duke vazhduar të luftojnë dhe të parandalojnë hyrjen e avionëve rusë në pjesë të caktuara të vendit,” tha ai.
Forcat ruse u ndaluan rreth 30 kilometra në veri të Kievit të shtunën, tha ai, duke vënë në dukje megjithatë se situata mund të ndryshojë shpejt.
“Forcat ruse janë” të pakënaqura me (“) rezistencën shumë të vendosur ukrainase që i ka ngadalësuar ato,” tha ai. “Bazuar në vëzhgimin tonë, kjo rezistencë është më e fortë se sa prisnin rusët.
Vendet perëndimore, veçanërisht Shtetet e Bashkuara, vazhdojnë të dërgojnë ndihma në Ukrainë, kryesisht në armë dhe municione”.
Ndihma e re ushtarake për Ukrainën
Sekretari amerikan i Shtetit Antony Blinken njoftoi të shtunën një ndihmë të re ushtarake prej 350 milionë dollarësh për Ukrainën për të ndihmuar Kievin të luftojë pushtimin rus.
“Kjo ndihmë do të përfshijë mbrojtje të reja ushtarake që do t’i mundësojnë Ukrainës të luftojë kërcënimet e blinduara, zbarkuese dhe të tjera ndaj të cilave është e ekspozuar sot,” tha Blinken në një deklaratë.
Këto përfshijnë raketa antitank, armë të lehta, municione dhe jelek antiplumb të destinuar për ushtarët ukrainas në fushën e betejës, shtoi zëdhënësi i Pentagonit, John Kirby.
Sipas një zyrtari të lartë të Pentagonit, dërgimi i ndihmave ushtarake në Ukrainë nuk u ndal me fillimin e ofensivës ruse.
“Unë mund t’ju konfirmoj se ata kanë marrë ndihmën tonë ushtarake këto ditë,” tha ai, duke shtuar se ngarkesa e raportuar nga Pentagoni të shtunën përfshin raketa antitank Javelin, një armë e avancuar e përdorur nga ushtria amerikane. /tesheshi.com/
