Mbrëmjen e së hënës u njoftua një pengmarrje në zonën e Velipojës në Shkodër, e cila vuri në lëvizje policinë lokale. Pas disa orësh, policia njoftoi se situate ishte zgjidhur dhe se kishte shoqëruar për sqarime në komisariat si shtetasin që akuzohej për pengmarrje ashtu edhe pengun.
I gjithë konflikti mes Dodë Gjikolajt dhe Pjetër Narkajt kishte lindur pasi ky i fundit nuk i kishte shlyer një borxh prej 4 mijë eurosh, huadhënësit.
Të hënën të mbrëmje Gjikolaj dhe Narkaj janë takuar dhe këtu kka nisur e gjithë zanafilla e ngjarjes, e cila sot duket se ka befasuar edhe policinë.
Fillimisht u raportua se Narkaj u morr peng dhe alarmin e dhanë familjarët e tij, që njoftuan policinë. Kjo e fundit nisi hetimet, identifikoi autorin dhe mjetin e përdorur, një makinë tip “Smart”, me targë Aa 681 BF, e cila përshkroi segmentin nga Velipoja drejt një banese në periferi të Shkodrës, shkruan Panorama.
Sipas hetimeve të deritanishme, rezulton se mes këtyre dy personave ka pasur një marrëveshje për kthimin e borxhit mbrëmjen e së hënës. Palët janë takuar, por situata shumë shpejt është përshkallëzuar, pasi 31- vjeçari Narkaj nuk i ka kthyer borxhin.
I akuzuari për pengmarrje, Dodë Gjikolaj, nuk e ka pranuar një fakt të tillë gjatë marrjes në pyetje në Komisariatin e Policisë Shkodër.
Para efektivëve, 38-vjeçari u shpreh se ishin takuar për t’u marrë vesh për shlyerjen e borxhit.
Këtij versioni i ka qëndruar edhe 31-vjeçari Pjetër Narkaj, i cili para policisë ka mohuar të jetë marrë peng për shkak të borxhit të pashlyer.
Pavarësisht këtyre deklarimeve, 38-vjeçari Dodë Gjikolaj, lindur në Kurbnesh, Mirditë dhe banues në Velipojë, do të akuzohet për pengmarrje, ndërsa policia vijon hetimet për zbardhjen e plotë të rrethanave të ngjarjes. /tesheshi.com/
